Nabi Kareem (SalAllaho Aliehe Waslam) ki nabuwat ki alamaat

Bismillah

Qalb e At’har ko zamzam say dhona

Hazrat Ans say marwi hai:

Rasool Allah (SalAllaho Aliehe Waslam) bachon kay sath khail rahay the k Hazrat Jibraeel Aap (SalAllaho Aliehe Waslam) kay paas aaye aur Aap (SalAllaho Aliehe Waslam) ko pakar ker zameen per lita diya, aur Aap (SalAllaho Aliehe Waslam) kay qalb e at’har say seena chaak kiya aur dil say khoon ka lothra nikal ker keha k yeh Aap (SalAllaho Aliehe Waslam) kay paas shaitan ka hissa tha phir dil ko sonay kay thaal main rakh ker aab e zamzam say dhoya aur usay mila ker dobara usi jagha per rekh diya. Wo bachay dortay huye Aap (SalAllaho Aliehe Waslam) ki walida yani Hazrat Halima kay paas aaye aur keha k Muhammad (SalAllaho Aliehe Waslam) ko qatal kiya ja chuka hai, to woh log Aap (SalAllaho Aliehe Waslam) kay paas aaye to dekha k Aap (SalAllaho Aliehe Waslam) ki rangat badli hui hai.

Hazrat Ans fermate hain k:

Main nay Aap (SalAllaho Aliehe Waslam) kay seena mubara main silayi kay naqoosh dekhay hain.


Pathar ka Salam kehna

Hazrat Jabir bin Samra say marwi hai, fermatay hain, Rasool Allah (SalAllaho Aliehe Waslam) nay irshad fermaya:

Makkah Mukarramah main main aik aisay pathar ko janta hon jo meray ailaan e nabuwat say pehlay mujhay salaam keha kerta tha aur main ab bhi usay pechanta hon.


Paharon aur darakhton ka Salam kehna

Hazrat Ali say marwai hai, fermatay hain k:

Makkah Mukarramah main hum Nabi Kareem (SalAllaho Aliehe Waslam) kay sath thay to Makkah say paharon aur darakhton kay darmiyan humara ana jana rehta tha, to Nabi Kareem (SalAllaho Aliehe Waslam) jis darakht aur pahar kay paas say guzartay woh pukar uth’ta “AS SALAM O ALIEKA YA RASOOL ALLAH” (Aye Allah kay Rasool (SalAllaho Aliehe Waslam) Aap per salamti ho.


Bhairiye ki Gawahi

Hazrat Abu Huraira say marwai hai, fermatay hain:

Aik bhairya aik raiwar kay paas aaya aur wahan say aik bakri utha li, to charwaha us kay peechay bhaga aur us say bakri cheen li, to woh bhairya aik teelay per cherh ker khara ho gya aur kehne lega k

Allah nay jo rizq mujhe aata kiya tha maine us ka qasd kiya, tum nay usay mujh say cheen liya.

To woh charwaha kehne lega k

Qasam ba’khuda! main nay is din ki manind kisi bhairiye ko baatain kerte nahi dekha.

To bhairiye nay keha k

Is say bhi ajeeb baat ye hai k do paharon kay darmiyan nakhlistan main aik admi hai jo tumhain guzishta baatain batata hai aur jo kuch ayenda honay wala hai us kay mualliq batata hai.

Wo charwaha yahoodi tha to Nabi Kareem (SalAllaho Aliehe Waslam) ki khidmat main hazir hua aur islam qabool ker liya. Nabi Kareem (SalAllaho Aliehe Waslam) nay is baat ki tasdeeq fermayi, phir fermaya

Ye qayamat ki nishaniyan hain aur anqareeb aisa ho ga k aik admi ghar say niklay ga to woh wapis aaye ga to us kay jutay aur kora us say woh baatain byan kerain ge jo us kay gher walon nay us kay baad ki hon gi.


Shayateen ki Gawahi

Hazrat ibn Abbas say marwi hai, fermatay hain k:

Nabi Kareem (SalAllaho Aliehe Waslam) sahaba kay sath akaaz (aik maila jo islam say pehle Makkah kay qareeb lagta tha) kay bazar ki taraf chalay. Us waqt shayateen aur asmaani khabron kay darmiyan parda hayel ho chuka tha, aur un per shahab e saqib giraye jatay the, to shayateen wapis lot aaye to kahanon nay keha

Tumhain kya hua hai?

To shayateen nay jawab diya k

Humare aur asmani khabron kay darmiyan parda hayel ho chuka hai aur hum per shahab e saqib giraye jatay hain.

To unhon ne keha k

Tumhare aur asamani khabron kay darmiyan koi nayi cheez hayel hui hai, lehaza zameen kay mashriq o maghrib main phail jao aur ghaur say dekho k woh kya cheez hai, jo tumhare aur asmaani khabron kay darmiyan hayel hui hai.

To woh shayateen tahama ki taraf jatay the woh Nabi kareem (SalAllaho Aliehe Waslam) ki taraf lotay. Aap (SalAllaho Aliehe Waslam) us waqt aik nakhlistaan main namaz e fajr ada ferma rahay the. Jab unhon ne Quran e Kareem suna to bohut ghaur say sun’nay legay aur phir keha.

Qasam ba’khuda! yehi woh cheez hai jo humare aur asmaani khabaron kay darmiyan hayel hui hai.

To wahan say jab woh apni qaum ki taraf lotay to unhon ne keha k

Quran-e-KareemTo bolay, hum nay ajeeb quran suna. Jo bhalayi ki rah batata hai, to hum us per imaan laye aur hum hargiz kisi ko apnay rab ka shareek na kerain ge
(Para: 29, Surah: Jinn, Ayat:2)

Is waqt Allah nay Nabi Kareem per ye ayat e mubaraka

Quran-e-KareemTum fermao, mujhe wahi hui k kuch jinnon nay mera perha kaan laga ker suna.
(Para: 29, Surah: Jinn, Ayat:1)

nazil fermayi aur jinnat ka qol wahi kiya gya.


Darakhton ka khabar daina

Hazrat Ma’an say marwi hai, fermatay hain k:

Main nay apnay walid say suna k main nay Hazrat Marooq say pucha k
Us raat jab jinnat nay Quran e kareem ghaur say suna tha Nabi Kareem (SalAllaho Aliehe Waslam) ko un kay muta’liq khabar kis nay di thi?To unhon nay keha k mujh say keha Tumhare walid yani Hazrat Abdullah bin Masood nay byan fermaya k

Aik darakht nay Nabi Kareem (SalAllaho Aliehe Waslam) ko khabar di k jinnat aaye hain.


Moajza: Chand kay do tukray hona

Hazrat Anas bin Malik say marwi hai k

Imam Malik kay qabeela walon nay Rasool Allah (SalAllaho Aliehe Waslam) say sawal kiya k inhain koi moajza dikha dain to Aap (SalAllaho Aliehe Waslam) nay chand do tukray ker k unhain dikhaya hata k unhon nay in do tukron kay darmiyan ghaar e Hira ko dekh liya.


Surah Dukhan (Dhuan)

Hazrat Masrooq say marwi hai k

Hum Hazrat Abdullah kay paas gaye to unhain nay fermaya k main anqareeb tumhain Surah Dukhan ya dhuain kay baray main bataon ga. Rasool Allah (SalAllaho Aliehe Waslam) nay Quraish ko islaam ki dawat di to unhon nay Aap (SalAllaho Aliehe Waslam) kay paas anay main susti ki, to Rasool Allah (SalAllaho Aliehe Waslam) nay dua fermayi k

Aye Allah! Hazrat Yusuf kay saat (7) saalon ki manind meri in kay khilaf madad ferma.

To aik saal aisa aaya jo sab kuch le gya, hata k unhon nay murdar aur chamra khaya aur bhook ki wajha say admi apnay aur asmaan kay darmiyan dhuan dekhta tha. Irshad e Bari Ta’ala hai:

Quran-e-KareemTo tum us din kay muntazir raho jab asmaan aik zahir dhuan laye ga, k logon ko dhanp le ga, ye hai dardnaak azaab.

(Para: 25, Surah: Dukhan, Ayat:10-11)

Fermate hain k phir unhon nay dua ki

Quran-e-KareemUs din kehain ge aye humare Rab hum per say azaab khol (dur ker) de hum imaan latay hain.
Kahan say ho inhain naseehat man’na, halan kay in kay paas saaf byan fermanay wala rasool tashreef la chuka.
Phir us say rugardan huye aur bolay (woh) sikhaya hua diwana hai.
Hum kuch dinon ko azaab kholay daitay hain, tum phir wohi (kufr) kero gay.

(Para: 25, Surah: Dukhan, Ayat:12-15)

Fermatay hain k un say azaab dur hua to woh phir kufr ki taraf lot aaye, to Allah nay unhain badr walay din pakar liya, fermane Bari Ta’ala hai:

Quran-e-KareemJis din hum sab say bari pakar pakrain gay. Beshak hum badla lainay walay hain.

(Para: 25, Surah: Dukhan, Ayat:16)

Popularity: 20% [?]

Post to Twitter Tweet This Post

Shaitan ka pasandeeda fitna

BismillahHadees 29:

Riwayat hai Hazrat Jabir say, fermatay hain fermaya Nabi (SalAllaho Aliehe Waslam) nay:

Shaitan pani per apna takht  bichata hai, phir apnay mukhtalif lashkar (saraya) ko logon main fitna dalnay kay liya bhaijta hai. [1]

Un main say aik aa ker kehta hai k main nay falan falan fitna phailaya, iblees kehta hai “kuch nahi”, phir dusra aa ker kehta hai k main nay falan ko us waqt tek na chora jab tek k us main aur us ki biwi main judai na daal di. iblees usay paas bithata hai aur kehta hai “Tu bohut acha hai”. Aa’mash fermatay hain, mujhe khayal hai k Nabi (SalAllaho Aliehe Waslam) ne fermaya “isay chimta laita hai”. [2]

(Muslim)

Sharah:

  1. Rozana subha kay waqt samandar per apna karobar shiru kerta hai, magar us ka takht samandar main doobta nahi kyun k woh khud bhi atishi hai aur us ka takht bhi atishi. “Saraya” k mani hain choti fauj, jin ki tadaad 5 afraad say 400 tek ho. Zariyat e shaitan ki mukhtalif jama’atain hain, in kay alag alag naam hain. Wazu main behkanay wali jamaat ka naam Walhaan hai, aur namaz main warghalnay wali jamaat ka naam Khinzab hai. Aise he masjidon main, bazaaron main, sharaab khanon main is ki alag alag faujain rehti hain.
  2. iblees apni zariyat main say usay apna qurb e khasusi daita hai jo logon main bari gumrahi ya fitna phaila ker aaye. Yani itna fitna phailaya k talaq waqiya kerwa di. Talaq agarcha mubah cheez hai magar aksar bohut fasadaat ki jar ban jati hai, is liye is per iblees khush hota hai. Is liye Nabi kareem (SalAllaho Aliehe Waslam) nay fermaya k jahan tek ho sakay is say bachna behter hai. Ya matlab ye hai k maine khawand biwi main judai daal di k khawand ne aurat ko mallaqa (latka hua, beech main phansa hua) ker diya k na choray na basaye, ye sakht jurm hai. Is hadees say do masalay maloom huye, aik ye k jo shakhs nahaq zaujain main judai ki koshish keray woh iblees ki terhan mujrim hai, us say woh amil log ibrat hasil kerain jo tafreeq e zaujain kay liye taweez o amaliyat kertay hain. Dusre ye k Hazoor (SalAllaho Aliehe Waslam) ki nigah say iblees waghaira koi cheez chupi nahi, kyun k Hazoor (SalAllaho Aliehe Waslam) musahida ferma kay ye sab ferma rahay hain.

Hadees 30:

Riwayat hai Hazrat Jabir say, fermatay hain fermaya Nabi (SalAllaho Aliehe Waslam) nay:

Shaitan is say to mayus ho chuka hai k arab kay namazi usay pujain. Laiken inhain apas main bharkanay main mashghool hai

(Muslim)

Sharah:

Yani arab kay aam musalmaan amaal e shirkiya na kerain ge, ya murtad na hon ge, aik adh admi ka kabhi murtad ho jana is kay khilaf nahi. Yani shaitan Arab ko apas main larata bharkata rahay ga. Akhir zamana e Usmani say jo ikhtilaf shiru hua woh aaj tek khatm honay main nahi aata.

Popularity: 19% [?]

Post to Twitter Tweet This Post

Waswasay ki hed

BismillahHadees 23:

Riwayat hai Hazrat Abu Huraira say, fermatay hain fermaya Rasool Allah (SalAllaho Aliehe Waslam) nay:

Tum say kisi kay paas shaitan aata hai to us say kehta hai k falan cheez kis nay paida ki, aur falan kis nay? [1]

yahan tek k kehta hai tumhare Rab ko kis nay paida kiya? [2]

Jab is hed ko pohanchnay legay to Aa’uzu Billah perh lo aur us say baaz raho. [3]

(Muslim, Bukhari)

Sharah:

  1. Ya to khud iblees kyun k woh tamam dunya per nazar rakhta hai aur sab main chakar lagata rehta hai. Ya qareen, jo her aik insaan ka alag alag shaitan hai, aur her waqt us kay sath rehta hai ya bura insaan jo aisi baatain ker kay logon ko behkaye.
  2. Paida woh cheez hoti hai jo napaid bhi ho sakay Allah to wajib-ul-wajud hai usay kon paida kere. Tamam taray suraj say roshan hain magar suraj kisi say roshan nahi
  3. Yani is ka jawab soachne ki koshish bhi mat kero werna shaitan sawal der sawal keray ga, Aa’uzu Billah perh ker usay bhaga do, her sawal ka jawab nai diya jata. Allah nay shaitan kay sajda na kerne per us kay dalayel ka jawab na diya, balke fermaya “Dafa ho ja yahan say”. Aa’uzu Billah shaitan ko bhaganay kay liye akseer hai.

Hadees 24:

Riwayat hai Hazrat Abu Huraira say, fermatay hain k fermaya nabi (SalAllaho Aliehe Waslam) nay:

Log aik dusray say puchtay rehain gay yahan tek k keha jaway ga k ye makhlooq to Allah nay paida ki to Allah ko kis nay paida kiya. To jo in main say kuch paye woh kehe main Allah aur us kay Rasool per imaan laya.

(Muslim, Bukhari)

Popularity: 24% [?]

Post to Twitter Tweet This Post

Hamzaad / Qareen ki tehqeeq

Bismillah

Hadees 25:

Riwayat hai Hazrat Ibn Masood say, fermatay hain k fermaya Rasool Allah (SalAllaho Aliehe Waslam) nay:

Tum main aisa koi nahi jis per aik sathi jinn aur aik sathi farishta muqarar na ho. Logon ne pucha Rasool Allah (SalAllaho Aliehe Waslam) Aap per bhi? [1]

Fermaya, mujh per bhi laiken Rab nay mujhe is per madad di, jis say woh musalman ho gya ab woh mujhe bhalayi ka mashwara daita hai. [2]

(Muslim)

Sharah:

  1. Yani her aqil baligh insaan kay sath waswasa dalnay kay liye aik shaitan aur ilham kay liye aik farishta rehta hai. Jab koi insaan ka bacha paida hota hai to, to us kay sath he iblees ka aik shaitan paida hota hai, jisay farsi main “Hamzaad”, arabi main “wasawis” kehte hain. Zahir ye hai k iblees kay her her aan sainkaron (hundreds) bachay paida hote rehte hain, jin ki tadaad aulad e insaan jitni hoti hai. Jaise machli, naagin sanp (snake) aik waqt main hazar ha anday daiti hai. Ta’ooni jaraseem her aan bachay daite rehte hain.
  2. Yahan islam say murad imaan he hai na k ita’at, aur ye Hazoor (SalAllaho Aliehe Waslam) ki aala darja ki khasusiyat hai k Aap (SalAllaho Aliehe Waslam) ka shaitan jis ki fitrat main kufr dakhil hai woh bhi imaan le aaya. Maloom hua k nigah e karam say fitrat badal jati hai. Hamaan ibn iblees nay Hazoor (SalAllaho Aliehe Waslam) ki khidmat main arz kiya k qatal e habeel kay waqt main mojud tha, saray anbiya kay sath raha hon, Aap (SalAllaho Aliehe Waslam) mujhe kuch quraan sikhaiye, Aap (SalAllaho Aliehe Waslam) nay usay Surah Waqiya, Mursalaat, Anbiya, Ikhlaas, Falaq aur Surah Naas sikhayien. Jinnah ka Hazoor (SalAllaho Aliehe Waslam) per imaan lana to Quran ki Surah Jinn say sabit hai, jab kay saray jinn iblees ki aulaad hain.

Hadees26:

Riwayat hai Hazrat Anas say, fermatay hain k fermaya Nabi (SalAllaho Aliehe Waslam) nay:

Shaitan insaan kay khoon kay thikanon main gardish kerta hai.

(Muslim, Bukhari)

Sharah:

Ya to iblees ya qareen shaitan, kyun k woh atishi hai. Is liye bila takalluf insaan kay rag o pay main saraiyat ker jata hai aur tasarruf kerta hai, ya us kay waswasay aur khayalat maloom kerta hai. Maloom hua k koi shakhs baghair fazal e Ilahi shaitan say nahi bach sakta.


Hadees 27:

Riwayat hai Hazrat Abu Huraira say, fermatay hain fermaya Nabi (SalAllaho Aliehe Waslam) nay:

Koi admi aisa nahi jisay paidaish kay waqt shaitan chuta na ho, woh bacha shaitan kay chunay say he cheekhta hai.[1]

Siva Mariyam aur un kay farzand kay.[2]

(Muslim, Bukhari)

Sharah:

  1. Hazrat Adam o Hawwa ko shaitan mass na ker saka tha kyun k woh admi zada nahi. Is say humare Hazoor (SalAllaho Aliehe Waslam) mustasna hain. Tehqeeq say sabit hai k Hazoor (SalAllaho Aliehe Waslam) rotay huye paida na huye.
  2. Yani Hazrat Eesa aur Hazrat Mariyam, in donon buzurgon ko shaitan na chu saka jaisa kay bukhari shareef ki hadees main kay paidaish kay waqt shaitan bachay ki kokh main ungli marta hai jis ki takleef say bacha cheenkhta hai. In donon buzurg ki paidaish kay waqt bhi shaitan nay ye harkat ki , magar us ki ungli hijab main lagi jo Rab nay un kay darmiyan paida ker diya tha.

Hadees 28:

Riwayat hai Hazrat Abu Huraira say, fermatay hain k fermaya Nabi  (SalAllaho Aliehe Waslam) nay:

Zameen per girte waqt bachay ka cheenkhna shaitan ki chookh say hai.

(Muslim, Bukhari)

Sharah:

Shaitan bachay ki kokh main ungli marta hai aur is ki takleef say bachay rota hai. Isi liye sunnat hai k bacha paida hotay he us ko ghusal day ker dahnay (right) kaan main azaan aur bayain (left) main takbeer kehi jaye ta k shaitan dafa ho, azan ki awaz say shaitan bhagta hai. Khayal rahay k shaitan ki ye harkat bachay per abhi say qabza jamanay kay liye hai, werna behkana hosh sanbhalnay kay baad shiru hota hai.

Popularity: 18% [?]

Post to Twitter Tweet This Post

Waswasay imaan ki alamat hain

Bismillah

Hadees 22:

Riwayat hai Abu Huraira say fermatay hain k Hazoor (SalAllaho Aliehe Waslam) kay

Sahaba main say kuch Hazoor (SalAllaho Aliehe Waslam) ki khidmat main hazir huye aur Aap (SalAllaho Aliehe Waslam) say puchnay lagay k “Hum apne dilon main aise khayalat mehsoos kerte hain k unhain byan kerna bohut bara gunnah maloom hota hai”. [1]

Fermaya Aap (SalAllaho Aliehe Waslam) nay k, “kya tum nay ye baat payi hai?” Arz kiya “Han”. Fermaya, “Ye khula hua imaan hai”. [2]

(Muslim)

Sharah:

  1. Ye sahaba kay kamal imaan ki daleel hai k waswasa per amal kerna to kya, isay zuban per latay bhi ghabratay hain.
  2. Yani waswasa ana imaan ki daleel hai, kyun k choar (thief) bharay gher main he jata hai aur shaitan momin ki fikr main zyada rehta hai. Ya waswason ko bura samjhna iman hai, kyun k kafir to unhain acha samjh ker us per imaan le aata hai.

Popularity: 28% [?]

Post to Twitter Tweet This Post

Buray iraday per pakar

Bismillah

Hadees 21:

Riwayat hai Hazrat Abu Huraira say, fermatay hain k fermaya Nabi (SalAllaho Aliehe Waslam) nay:

Yaqeenan Allah nay meri ummat say un kay dili khatrat main darguzar ferma di, jab tak k us per kaam ya kalam na kerain.

(Muslim, Bukhari)

Sharah:

Yani buray khayalat per pakar nahi, ye is ummat ki khasusiyat hai. Pichli ummaton main is per bhi pakar thi. Khayal rahay k buray khayalat aur hain bura irada kuch aur, aur buray iraday per pakar hai hata k irada e kufr bhi kufr hai. Hazrat Sheikh Abdul Haq fermate hain k jo bura khayal dil main be-ikhtiyar achanak aa jata hai usay “Hajis” kehtay hain, ye ani fani hota hai, aaya aur gya, pichli ummaton ko bhi muaf tha aur humain bhi muaf hai. Laikin jo dil main baqi rah jaye woh hum per muaf hai pichli ummaton per na tha. aur agar us kay sath dil main lazzat aur khushi paida ho, isay “Hum” keha jata hai, is per bhi pakar nahi, aur agar is kay sath ker guzernay ka irada bhi ho to woh azm hai, us ki pakar hai. Khayal rahay k irada gunnah agarcha gunnah hai magar is per had nahi, irada zina gunnah hai magar zina jaisa nahi. Qoli (bolay janay wala) gunnah main kalam ka aitebar hai aur faili (kiya janay wala) main kaam ka.

Popularity: 5% [?]

Post to Twitter Tweet This Post

Waswasa (Buray khayalat) aur ilham main farq

Bismillah

Waswasa kay lughwi mani hain narm awaz, istelah main buray khayalat, fasid fikr ko waswasa kehte hain, aur achay khayalat ko ilahm. Waswasa shaitan ki taraf say hota hai aur ilham Allah ki taraf say. Haq ye hai k ghair Nabi ka ilham sharayi hujjat nahi kyun k shuba hai k woh shaitani waswasa ho.

Waswasa say mutalliq ahadees aur sharah agli posts main byan ki jayain gi INSHALLAH.

Ahadees:

Buray iraday per pakar

Waswasay imaan ki alamat hain

Hamzaad / Qareen ki tehqeeq

Waswasay ki hed

Shaitan ka pasandeeda fitna

Khinzab ka waar aur is ka ilaaj

View all posts related to Waswasa

Popularity: 24% [?]

Post to Twitter Tweet This Post

Munafiq ki alamaat

BismillahHadees 18:

Riwayat hai Hazrat Abu Huraira say, fermatay hain k fermaya nabi (SalAllaho Aliehe Waslam) nay:

Munafiq ki teen alamaat hain. (Muslim ne ye izafa bhi byan kiya. “Agar ye roza rakhay, namaz perhay, apnay aap ko musalman samjhay.” phir Muslim aur Bukhari mutafiq ho gaye) Jab baat karay to jhoot bolay, wada keray to khilaaf keray, amanat di jaye to khayanat keray.

(Muslim, Bukhari)


.
Hadees 19:

Riwayat hai Hazrat Abdullah ibn Umar say, fermatay hain fermaya Nabi (SalAllaho Aliehe Waslam) nay k:

Jis main char aeb (naqs, burayi) hon woh nira munafiq hai, aur jis main aik aeb ho in main say us main munafiq ka aeb ho ga jab tek kay usay chor na day. Jab amanat di jaye to khayanat keray, jab baat keray to jhoot bolay, jab wada keray to khilaf keray, jab leray to galiyan bakay.

(Muslim, Bukhari)


Hadees 20:

Riwayat hai Hazrat Ibn Umar say, fermatay hain fermaya, fermaya Nabi (SalAllaho Aliehe Waslam) nay:

Munafiq us bakri ki terhan hai jo do bakron kay dermiyan ghomay, kabhi is bakray kay paas pohanch jaye kabhi us bakray kay paas.

(Muslim)

Sharah:

Donon ko razi kerne aur donon say lazat aur nafa hasil kerne kay liye. Khayal rahay k kafir o momin sab ko razi kerne ki koshish main rehna khaternaak bemari hai. Jis say us ka khud apna koi deen nahi rehta. Isi liye yahan gandi cheez say tashbeeh di gyi hai ta k dilon mian is say nafrat paida ho.

Popularity: 4% [?]

Post to Twitter Tweet This Post

Kon say gunnah bohut baray hain

Bismillah

Hadees 15:

Riwayat hai Abdullah ibn Masood say, fermate hain k:

Aik shakhs nay arz kiya Hazoor (SalAllaho Aliehe Waslam) kon sa gunnah bohut bara hai Allah k han. Fermaya, ye k tum Allah ka shareek thekrao, halankay us nay tumhain paida kiya. [1]

Arz kiya phir kon sa? Fermaya, ye k apni aulad is der say maar dalo k woh tumhare sath khana khaye. [2]

Arz kiya phir kon sa? Fermaya, ye k apnay parosi ki biwi say zina kero.

Tab Allah nay is ki tasdeeq main ye Ayat utari “Aur woh jo khuda kay sath dusray mabood ko nahi pujtay aur na us jaan ko nahaq qatal kerain jisay Allah nay haram kiya aur na zina kerain”

(Muslim, Bukhari)

Sharah:

Buri cheez ka naam gunnah hai is ki 4 iqsaam hain:

  • Woh jo baghair toba muaf na hon, jaise kufr o shirk.
  • Woh jo naik amaal ki barkat say bhi muaf ho jain, jaise gunnah saghira.
  • Jin kay baghair tauba muaf hone ki bhi umeed ho jaise haqooq Allah kay kabira gunnah.
  • Jin ki muafi kay liye tobah kay sath makhlooq ko bhi razi kerna peray jaise haqooq ul ibaad.
  1. Yani shirk o kufr k ye kabira gunnah main bhi sab say baray hain.
  2. Jaisa kay arab main dastoor tha k ghareeb log kharch kay khof say baitay aur baitiyon donon ko qatal ker daite the. Kyun k is main beqasoor jaan ko qatal kerna aur apnay qarabat dar per zulm kerna aur Khuda ki razaqiyat per aiteqaad na kerna, teenon baatain shamil hain is liye is ka darjah kufr o shirk k baad rakha gya hai.
  3. Zina khud gunnah e kabira hai aur is main paroshi ka haq barbaad kerna bhi hai kyun k her shakhs apnay parosi per aitemaad kerta hai aur us kay jaan o maal o aabru ki hifazat ko apna ferz samjhta hai.
  4. Is ayat main in mujrimon ki taraf ishara hai jin ki saza qatal hai, jaise murtad ho jana, ya zina ya zulman qatal yani agar momin in teen main se koi jurm keray ga qatal kiya jaye ga.

Khayal rahay k yahan gunnah kabira 4 byan kiye gye hain zaruret aur moqa kay lehaz say. Abdullah ibn Abbas fermate hain k gunnah kabira 70 hain.


Hadees 16:

Riwayat hai Abdullah ibn Amro say, fermate hain k fermaya Rasool Allah (SalAllaho Aliehe Waslam) nay k:

Allah k sath shirk, maa baap ki nafarmani, jaan ka qatal, jhooti qasm baray gunnah hain.

(Muslim, Bukhari)


Hadees 17:

Riwayat hai Abu Huraira say, fermate hain k fermaya Rasool Allah (SalAllaho Aliehe Waslam) nay:

Saat (7) halakaton say bacho. Logon ne pucha Hazoor (SalAllaho Aliehe Waslam) woh kya hain? Fermaya:

  1. Allah kay sath shirk
  2. Jadu [1]
  3. Nahaq us jaan ko halak kerna jo Allah nay haram ki
  4. Sood khori [2]
  5. Yateem ka maal khana
  6. Jihad kay din peeth dikhana [3]
  7. Paak daman bay khabar bibiyon ko bohtaan lagana [4]

(Muslim, Bukhari)

Sharah:

  1. Yani jadu kerna ya bila zaruret jadu seekhna, khayal rahay k jadu utarne k liye jadu seekhna jayz balkay zaruri hai, agar jadu main alfaz e kufrya hain to jadugar murtid ho jata hai, werna sirf mufsid, donon qism k jadu ger wajib ul qatal hain.
  2. Sood lain, chahay khaye, pehnay ya kisi aur kaam main laye, sab gunnah kabira hai. Is say ye bhi maloom hua k sood laina gunnah kabira hai na k daina.
  3. Yani kuffar kay muqabla main bhaag jana, kyun k is main ghaziyon ko nuqsaan hota hai aur islam ki toheen. Khayal rahay k jihad say bhagna gunnah kabira hai jab k buzdili say ho, agar kuffar ka dabao barh janay say majbooran morcha chorna paray to is ka ye hukam nahi, aise moqay per dat jana aur shaheed ho jana afzal hai, per peechay jana gunnah kabira nahi. Tadbeer e jangi ki bina per peechay hatna sawab hai.
  4. Zina ka bohtan, chahay naik-bakht zina ko janti bhi na ho, unhain tohmat lagana gunnah kabira hai. Kisi aurat ko ghussa main zaniya ya badmuash kehna bhi isi main shamil hai. Khayal rahay k naik mard aur chalak auraton ko bhi zina ki tohmat lagna gunnah kabira hai, magar ghafil auraton ko tohmat lagana bohut zyada gunnah hai. Jis ki saza is dunya main koray aur akhirat main sakht azaab hai.

Marqaat main hai k 17 gunnah bohut sakh hain. 4 dil kay (shirk o kufr, gunnah per arnay ki niyyat, Allah ki rehmat say mayusi, azab per aman). 4 zuban kay (jhooti gawahi, paak damanon ko tohmat, jhooti qasam, jadu). 3 pait kay (yateem ka khana, sharab peena). 2 sharamgah kay (zina, lawatat). 2 hath kay (chori, nahaq qatal). 1 paon ka (maidan jihad say bhag jana). 1 saray jism ka (walidain ki nafermani)

Popularity: 64% [?]

Post to Twitter Tweet This Post

Gunnah e Kabira

Bismillah

Gunnah e kabira woh hai:

  • Jis ki mumaniat daleel e qatayi say sabit ho
  • Jis per shariat nay kuch saza muqarar ki ho
  • Jis say deen ki toheen ho
  • Jo chotay gunnah kay hisab say kabira ho
  • Jis chotay gunnah per hamaishgi ki jaye
  • Jo aik he gunnah aik kay liye saghira aur dusray kay lehaz say kabira (Musalman ki toheen gunnah e saghira hay, ulama ki toheen gunnah e kabira. Nabi ya Quran ya Kaabah ki toheen kufr.

Gunnah e kabira say mutalliq ahadees aur sharah agli posts main byan ki jayain gi INSHALLAH.

Ahadees:

Kon say gunnah bohut baray hain

Munafiq ki alamaat

View all posts related to Gunnah e kabira

Popularity: 11% [?]

Post to Twitter Tweet This Post

Page 4 of 5«12345»
Get Adobe Flash playerPlugin by wpburn.com wordpress themes