Azab e qabr ki suratain

Hadees 64:

Riwayat hai Hazrat Usman say k

Hazrat Usman jab kisi qabr per kharay hotay to itna rotay k aap ki darhi ter ho jati, arz kiya gaya k aap jannat dozakh ka zikr kertay hain to nahi rotay is say rotay hain [1] , fermaya k Hazoor (SalAllaho Aliehe Waslam) nay fermaya k:

Qabr akhirat ki manzilon main pehli manzil hai, agar is say nijat pa gaya to baad wali manzilain is se asan ter hain [2]. Aur agar is say he nijat na payi to baad wali manzilain is se sakht hain. [3]

Fermaya Rasool Allah (SalAllaho Aliehe Waslam) nay k:

Main nay koi manzar na dekha magar qabr is say zyada wehshat naak hai. [4]

(Tirmizi, Ibn e Maja)

Sharah:

  1. Murday ki yaad main nahi balke qabr ki haibat main aur azab e qabr kay khof say, agarcha aap her qism kay azab say mahfooz thay aur zuban e Mustafa (SalAllaho Aliehe Waslam) say jannat ki basharat pa chuke the, laiken haibat dil main mojud thi jo iman ka taqaza hai.
  2. Yani mernay k baad qabr, hashar, meezan, pul sirat waghira, bohut si manzilon say humain guzerna hai, laiken tamam manzilon ka pata qabr say chal jata hai. Yahan bach gaya to INSHALLAH agay bhi mahfooz rahay ga, balkay gunnah gar momin kay liye qabr ka arzi azab us k gunnahon ka kaffara ho ga.
  3. Yani qabr ka dayemi azab kuffar kay liye hai, is kay liye hashar o pul sirat qabr say zyada khaternaak hain.
  4. Yani duniya ki bari bari museebatain qabr kay mamooli azab say bhi asaan hain. Aish main rehne walay kafir ko qabr main aik garm hawa de ker puchain gay k kya tu nay kabhi aish dekha tha? woh kahay ga, main janta bhi nahi tha k aish kya cheez hai, museebat-zada apne maal aulad ko dekh ker tasalli pata hai, qabr main kisay dekha ge.

Hadees 65:

Riwayat hai Hazrat Usman say, fermatay hain k:

Jab Nabi (SalAllaho Aliehe Waslam) mayyet kay dafn say farigh hotay to wahan kuch dair thehrtay aur fermatay, apnay bhai kay liye dua e maghfirat karo [1] , phir is kay liye sabit qadm rehnay ki dua karo, k is say ab sawalaat ho rahay hain [2].

(Abu Da’ud)

Sharah:

  1. Humaray han riwaj hai k dafnanay kay baad foran wapis nahi hotay, balkay qabr kay aas paas halqa bana ker kharay hotay hain, kuch perh ker bakhshtay hain, aur mayyet kay liye dua kertay hain, in sab ka makhaz ye hadees hai, ye tamam amaal sunnat hain.
  2. Yani honay walay hai kyun kay hisab e qabr logon kay lotnay kay baad shiru hota hai, is say maloom hua k zindon ki dua say murdon ko faida hota hai, aise he in k sadqaat o khairat mayyet ko mufeed hotay hain. Abu Amama ki riwayat main hai k Hazoor (SalAllaho Aliehe Waslam) irshad fermtay hain k dafn kay baad qabr kay serhanay kharay ho ker ye keho aye falan ibn falan woh kalma yaad ker jisay tu dunya main perhta tha, tera rab Allah hai, tera deen islam hai, teray Nabi Muhammad Mustafa (SalAllaho Aliehe Waslam) hain. Hazrat Abdullah ibn Umar ki riwayat hai k dafn kay baad serhana e qabr per surah baqra ka pehla ruku aur paienti (paon ki taraf) akhri ruku perhna mustahib hai. Sheikh ibn Hamam fermatay hain k qabr per Quran perhna bohut aala hai.

Hadees 66:

Riwayat hai Hazrat Abu Saeed say, fermtay hain fermaya Rasool Allah (SalAllaho Aliehe Waslam) nay:

Kafir per us ki qabr main ninyanway (99) sanp musallat kiye jatay hain [1]. Jo usay qayamat tek nochtay aur dastay rehain gay [2] . Agar in main se aik sanp zameen per phoonk maar de to kabhi sabza na ugay [3].

[Darmi, Tirmizi]

Sharah:

  1. Kyun kay kafir Allah kay 99 namon ka munkir hai, is liye us per 99 sanp muqarar huye. Allah ki 100 rehmatain hain, aik duniya main aur 99 momin per akhirat main, kafir in naymaton ki jagha sanp pata hai.
  2. Yani koi nochay ga, koi dasay ga.
  3. Is terhan k is ki germi aur zehr ki wajha say mitti pak jaye aur sabzay kay qabil na rahay, jahan atom bomb perta hai woh jagha naqabil e kasht ho jati hai.

Hadees 67:

Riwayat hai Hazrat Jabir say, fermtay hain fermaya Rasool Allah (SalAllaho Aliehe Waslam) nay k:

Jab mayyet qabr main dakhil ki jati hai to usay suraj doobta hua maloom hota hai [1], to woh ankhain malta hua baith’ta hai aur kehta hai mujhe choro main namaz perh lon [2].

(Ibn e Maja)

Sharah:

  1. Ye ehsaas munkar nakeer (Nakeerain) k jaganay per hota hai, chahay dafn kisi bhi waqt ho. Kyun kay namaz e asar ki zyada takeed hai aur aftab ka doobna namaz e asar jatay rehne ki daleel hai, is liye ye waqt dikhaya jata hai.
  2. Yani aye farishton sawalat baad main kerna, asar ka waqt ja reha hai, mujhe namaz perh lainay do. Ye wohi kehay ga jo dunya main asar ka paband tha, Allah naseeb karay. Isi liye Allah fermta hai k tamam namazon ki khasusan beech wali namaz ki  bohut negehbani (take care) kero. Sufiya karam fermatay hain, jaisay jiyo gay waisay he maro gay, aur jaisay maro gay waisay he utho gay.  Mumkin hai k is arz per sawal jawab he na hon aur hon to nihayat asaan, kyun kay is ki yehi guftagu tamam sawalon ka jawab ho gi.

Popularity: 36% [?]

Post to Twitter Tweet This Post

Qabr main akhirat ka thikana paish kiya jata hai

Hadees 63:

Riwayat hai Abdullah ibn Umar say, fermatay hain k fermaya Rasool Allah (SalAllaho Aliehe Waslam) nay:

Tum main say jab koi marta hai to subha sham us per us ka thikana paish kiya jata rehta hai. [1] Agar jannati hai to jannat ka thikana, aur agar dozakhiyon main say hai to dozakh ka thikana. [2] Phir us say kaha jat hai k ye tera thikana hai ta k qayamat kay din Allah tujhe idher bhaijay. [3]

(Muslim, Bukhari)

Sharah:

  1. Yahan subha sham say murad hamaishgi hai, yani mayyet her waqt apne jannati ya dozakhi thikanay ko dekhti rehti hai.
  2. Dekhta rehta hai aur qabr main jannat ki khusboyain, wahan ki thandak balke wahan kay phal bhi atay rehte hain, aise he kafir ki qabr main dozakh ki loo, wahan ki badbu, sanp bichu pohanchtay rahtay hain. Khayal rahay k qabr main janant ka araam ya dozakh ki takleef pohanchti hai, magar jism ka jannat ya dozakh main jana qayamat kay baad he ho ga. Shaheedon ki rooh martay he jannat main pohanch jati hai, jismani dakhila un ka bhi qayamat kay baad ho ga.
  3. Momin ki rooh qabr main ya kisi aur muqaam per qaid nahi hoti balke ba’az roohain to tamam alam main chaker lagati hain, maghar asar garh (headquarter) qabr he hoti hai, aur ta’lluq wahan se her waqt rehta hai, jaise sonay ki halat main sailani rooh ka ta’lluq jism say, isi liye zyarat e qaboor ki jati hai aur wahan mayyet ko isaal e sawab aur arz marooz kiay jata hai.

Popularity: 7% [?]

Post to Twitter Tweet This Post

Hazoor kay ghoray nay azab e qabr dekha aur uchla

Hadees 62:
Riwayat hai Hazrat Zaid bin Sabit say, fermatay hain k:

Nabi (SalAllaho Aliehe Waslam) bani najar kay bagh main apnay khachar per sawar the [1], aur hum Hazoor (SalAllaho Aliehe Waslam) kay sath thay k achanak aap ka khachar bidka, qareeb tha k Aap (SalAllaho Aliehe Waslam) ko gira daita [2].

Wahan panch chay (5-6) qabrain thien. Hazoor (SalAllaho Aliehe Waslam) nay fermaya in qabron ko koi pehchanta hai? Aik shakhs nay arz kiya k main (janta hon) [3].

Hazoor (SalAllaho Aliehe Waslam) nay fermaya ye kab meray, arz kiya k zamana e shirk main [4]. Tab Hazoor (SalAllaho Aliehe Waslam) nay fermaya k is guroh (Group) ko apni qabron main azab diye jatay hain. Agar ye khatra na hota k tum dafn kerna choro gay to main Allah say dua kerta k is azab say kuch tumhain bhi suna de jo main sun reha hon [5].

Phir humari taraf chehra ker kay fermaya k dozakh kay azab say Allah ki panah mango, sab nay kaha hum dozakh kay azab say Allah ki panah mangtay hain. Fermaya azab e qabr say Allah ki panah mango, sab bolay hum azab e qabr say Allah ki panah mangtay hain. [6 ]Fermaya khulay chupay fitnon say Allah ki panah mango, sab bolay hum khulay chupay fitnon say Allah ki panah mangtay hain [7]. Fermaya dajjal kay fitna se Allah ki panah mango, sab bolay hum dajjal kay fitna say Allah ki panah mangtay hain. [8]

(Muslim)

Sharah:

  1. Bani najjar ansar ka aik bara qabeela hai, in he ki choti bachiyan hijrat kay din Hazoor (SalAllaho Aliehe Waslam) ki tashreef awari per daff bajati aur ga ga ker khushiyan manati thien.
  2. Khachar azab e qabr dekh ker bidka, maloom hua k jis khachar per Hazoor (SalAllaho Aliehe Waslam) sawar ho jain us ki ankh say ghaibi hijab uth jatay hain k woh qabr kay ander ka azab dekh laita hai, to jis wali per Hazoor (SalAllaho Aliehe Waslam) ka dast e karam per jaye woh arsh o farsh dekh laita hai, khayal rahay k janwar azab e qabr walon ki cheekh o pukar sun laite hain, magar azab e qabr dekhna Hazoor (SalAllaho Aliehe Waslam) ki barkat say tha werna humare ghoray din raat qabron per guzertay hain na bidaktay hain na uchaltay hain.
  3. Ye sawal apni beilmi ki wajha se nahi, balke dusron ki zuban se ye halaat sunwanay kay liye pucha tha.
  4. Aap ki tashreef awri say pahlay ya baad Aap (SalAllaho Aliehe Waslam) ka inkar ker kay,  is say maloom hua k zahoor e islam say pehle jo mushrik ho ker mara usay bhi azab e qabr ho ga aur kuffar ka azab kabhi khatm nahi hota na us kay liye dua e maghfirat ki jaye, na isaal e sawab waghaira, murday ko koi dawa mufeed nahi, kafir ko koi dua faida mand nahi. Isi liye Hazoor (SalAllaho Aliehe Waslam) nay un kay liye na dua fermayi na sabza waaghara dala jaisa k gunahgaron ki qabr per khajur ki shakh dali thi, jis ka zikr agay aaye ga.
  5. Ye khitaab saray musalmanon say hai na k sirf sahaba say, ba’az sahaba aur oliya Allah to azab e qabr ko suntay aur dekhte hain, matlab ye k azab e qabr aisi dehshatnaak cheez hai k agar awam usay dekh lain to dehshat say dewanay ho jain aur apnay murdon ko dafn kerna bhool jain, ye matlab nahi k dafn na kernay say azab nahi hota, lehazab hadees per koi aiteraaz nahi.
  6. Agarcha azab e qabr pehle aur azab e dozakh baad main hai, laiken kyun k azab e dozakh sakht hai aur azab e qabr halka k dozakh main aag hai aur qabr main aag ka asar, is liye dozakh ka zikr pehle fermaya aur qabr ka baad main.
  7. Khulay fitanay bad’amaliyan hain, yani jism kay gunnah aur chupay fitnay bad’aqeedgiyan, hasad keena waghaira hain, yani dil kay gunnah, matlab ye k in tamam buraiyon say panah mango jo azab e dozakh ya azab e qabr ka sabab hain. Kyun k bazahir ye takleef de nahi hotay is liye in ka zikr baad main kiya gaya.
  8. Ye dua agali naslon ki taleem kay liye aur sahaba kay dilon main fitna dajjal ki haibat qayem kernay kay liye hai werna Hazoor (SalAllaho Aliehe Waslam) ko ilm tha k sahaba kay zamana main na dajjal aaye ga na is kay fitnay.

Popularity: 12% [?]

Post to Twitter Tweet This Post

Munkar nakeer kay sawalat (2 of 2)

Hadees 60:

Riwayat hai Hazrat Abu Huraira say, fermatay hain fermaya Rasool Allah (SalAllaho Aliehe Waslam) nay:

Jab mayyet dafn ki jati hai [1], to us kay paas do syah rang, neeli ankhon walay, farishtay aatay hain [2].

Aik ko munkar dusray ko nakeer kaha jata hai. Woh kehtay hain “tu in sahab kay baray main kya kehta hai?” [3].

To mayyet kehti hai ye Allah kay banday hain aur us k Rasool, main gawahi daita hon k Allah kay siva koi mabood nahi aur yaqeenan Muhammad (SalAllaho Aliehe Waslam) Allah kay banday aur us kay rasool hain. [4]

Tab woh kehtay hain k hum to jantay the ye kon hain [5].

Phir us ki qabr main farakhi (wus’at) di jati hai 70 gaz main.[6]  Phir us kay liye wahan roshni ker di jati hai. [7]

Phir usay keha jata hai so ja, woh kehta hai main apnay gher jaon ta k unhain ye khabar don. [8]

To woh kehte hain dulhan ki terhan so ja jaise us kay pyaray khawand kay siva gher ka koi nahi jagata. Ta k Allah usay is khwab gah say uthaye ga.[9]

Aur agar murda munafiq ho to woh kehta hai k main nay logon say kuch kehtay suna tha isi terhan main bhi keh daita tha main nai pehchanta. [10]

Tab woh kehtay hain k hum to jantay the k tu yeh kehay ga. [11]

Phir zameen say kaha jata hai is per tang ho jao. Is qadr tang ho jati hai k murde ki pasliyan idher udhar ho jati hain. [12]

Phir woh qabr kay azab main he rehta hai, ta k Allah usay is thikanay say uthaye. [13]

(Tirmizi)

Sharah:

  1. Arab main aam murday dafn he hote the is liye yahan lafz ‘dafn’ ferma diya werna jo murda dafn na bhi ho, balke usay jala ker khak ker diya gya ho ya shair (lion) ya machli (fish) kha jaye us say bhi ye sawal jawab hote hain, agercha ajza dunya main bikhar gaye hon.
  2. Ye donon farishtay woh hain jo hisab e qabr per muqarar hain, ye insani shakel bana ker is rang main is liye atay hain ta k in ki haibat (dehshat, der) say kuffar to ghabra jain aur hairani say jawab na de sakain aur momin mutmaeen rehain aur ba asani jawab dain, ye ghabrahat aur itmenaan kafir o momin main ferq kay liye hai. Is say do maslay maloom hotay hain. Do farishtay aik he pal main hazar qabron main pohanch jatay hain, lehaza oliya ka aik waqt main kuch jaghon pe paya jana mumkin hai. Dusra ye k jab noor shakel e insani main aaye to jism e insani kay lawazmaat us main paye jayain ge, farishtay noor hain aur noor na to kala hota hai na neela, per jab insaan ki shakel main aaye to in kay chehray ka rang kala bhi ho gaya, ankhain neeli bhi. Hazrat Musa A.S. ki lathi jab sanp banti to khati peeti bhi thi. Haroot Maroot farishtay jab insani shakal main aaye to khatay peetay balkay sohbat bhi ker saktay thay. Is say woh log ibrat pakrain jo kehte hain k agar Hazoor (SalAllaho Aliehe Waslam) noor the to khatay peetay kyun the?
  3. Hazoor (SalAllaho Aliehe Waslam) ka chehra mubarak her qabar main jawla ger ho jata hai jaise her aiena (mirror) main suraj, ba’az ulama fermatay hain k qabr say roza tek kay saray hijab utha diye jatay hain.
  4. Qabr main sawal bhi teen hote hain aur jawab bhi teen, magar yahan sawal to aik fermaya gaya jo sab ka majmua tha, aur jawab teenon ka, toheed ka bhi, deen ka aur risalat ka bhi.
  5. Yani ye sawal jawab to qanooni tor per hai, hum teray imaan say bekhabar na thay, maloom hua k yeh farishtay her shakhs kay kufr o imaan say khabardar hain, in ka ye ilm hai to humare Hazoor (SalAllaho Aliehe Waslam) kay ilm ka kya puchna.
  6. Yani 4900 gaz jo k 70 ko 70 say zarab (multiply) ker kay aata hai, yani 70 gaz lambi aur 70 gaz chori (wide), ba’az riwayat main ta had e nazar hai, woh isi ki tafseer hai.
  7. Ye roshni chand suraj waghaira ki nahi hoti balkay noor e Ilahi ya Noor e Mustafa (SalAllaho Aliehe Waslam) ki jagmagahat hoti hai, mumkin hai k iman e qalbi ka noor ho, tab bhi wohi mani hain.
  8. Yani main kamiyab ho gaya aur bohut araam main hon, maloom hua k mayyet apnay gher walon ko pehchanti hai, aur wahan pohanchnay ki bhi taqat rekhti hai, kyun k woh ye nai kehta k tum mujhe lay chalo, ya sawari lao, balkay kehta hai k main jata hon, agarcha us k gher walay bohut door bastay hon.
  9. Yahan sonay say murad araam kerna hai, yani ye barzakhi zindagi araam say guzar k tujh tek siva Khuda ki rehmat kay, aur koi afat ya bala nahi pohanch sakay gi, jaise k dulhan k paas dulha kay siva koi nahi pohanchta, ye neend ghaflat wali murad nahi. Qurani Ayat k mutabiq Allah kay maqbool qabar main jannati rozi khatay hain, khush o khurram rehtay hain, aur dunya kay logon ki khabar rekhtay hain, agar woh so gaye hotay to phal (fruit) kaise khatay, yahan ki khabar kaise rekhtay, aur qabristan (graveyard) main pohanch ker salam kerna sunnat na hota, kyun k surton (bejaan shaklon) ko salam kerna mana hai. Ye hadees buzrgon kay urs ka makhaz (Base) hai, kyun k farishton nay is din sahib e qabr ko uroos (dulhan) keha hai, lehaza is din ka naam roze e urs hai. Maut momin ki shadi ka aur kafir ki giriftari ka din hai.
  10. Maloom hua k dili imaan qabr main sath jaye ga na k sirf zubani islam.
  11. Kyun k loh e mahfooz humare samnay hai, tera kufr per merna humain maloom hai, teri paishani (forehead) main kufr ki tareeki dikh rehi hai, ye sawal sirf qanoonan tha.
  12. Yani dayien (right) paslian bayien (left) taraf, aur bayien paslian dayien taraf. Laiken is ki ye halat humari his (sense) say bala hai, agar hum kafir ki laash dekhain to waisi he sahih maloom ho gi. Khayal rahay k aik qabr main kafir o momin dafn hon ge, to wohi qabr kafir kay liye tang aur momin kay liye farakh (wasi’e) ho gi, momin kay liye roshan, aur kafi kay liye andhairi, momin kay liye thandi aur kafir kay liye garm, momin kay liye mehki hui aur kafir kay liye badbudar. Jaise aik he bister main do admi so rahay hon aik achay aur khush kun khwab dekhe aur dusra peraishan kun aur haibatnaak (khofnaak) khwab dekhe, bister aik he hai magar donon ki halatain mukhtalif hain. Khwab barzakh (merne k baad qayamat tek ka zamana) ki aik misal hai, khwab aksar khayal hote hain, barzakh main haqeeqat ho gi. Pasliyon ka zikr fermana samjhanay kay liye hai, werna jin kuffar ki pasliyan rakh bana di gayi, ya janwar kha gaye, un ki rooh per bhi tangi aisi he ho gi, is kay liye qabr aik shikanja (mujrimon ko saza daine ka ala (tool)) hai.
  13. Yani qayamat tek. Maloom hua k kafir ka azab kisi tadbeer say bhi khtam ya halka nahi ho sakta, gunnahgar momin ka azab e qabr buzurgon kay qadam aur zindon kay isaal e sawab waghaira say halka ho jata hai.

Hadees 61:

Riwayat hai Bara ibn Azib say, fermatay hain fermaya Rasool Allah (SalAllaho Aliehe Waslam) nay k:

Murday kay paas do farishtay aatay hain, usay bithatay hain.[1]

Phir us say kehtay hain tera Rab kon hai? woh kehta hai mera rab Allah hai. Phir kehte hain tera deen kya hai? woh kehta hai mera deen islam hai. Phir woh kehtay hain ye kon sahab hain jo tum main bhaijay gaye? to woh kehta hai woh Rasool Allah (SalAllaho Aliehe Waslam) hain.[2]

Farishtay kehtay hain tujhe ye kaise maloom hua?[3] woh kehta hai main nay Allah ki kitab perhi hai us per imaan laya usay sacha jana. [4]

Hazoor (SalAllaho Aliehe Waslam) nay fermaya, phir asmaan say pukarnay wala pukarta hai k mera banda sacha hai. [5]

Lehaza is kay liye jannat ka bister bichao isay jannat ka libas pehnao aur is kay liye jannat ki taraf derwaza khol do, pas khol diya jata hai, fermatay hain k, is tek jannat ki hawa aur wahan ki khusbu aati hai, [6] aur ta had e nazar qabr main farakhi (wus’at) ker di jati hai. [7]

Raha kafir, Hazoor (SalAllaho Aliehe Waslam) nay is ki maut ka zikr fermaya, fermaya k us ki rooh us kay jism main lotayi jati hai aur us kay paas do farishtay atay hain phir wo usay bithatay hain aur us say kehtay hain tera rab kon hai? [8] woh kehta hai haye haye main nahi janta. [9]

Phir us say puchtay hain tera deen kya hai? woh kehta hai haye haye main nahi janta. [10]

Phir woh kehtay hain k ye kon sahab hain jo tum main bhaijay gaye? [11] to woh kehta hai k haye haye main nai janta. [12]

Tab pukarnay wala asmaan say pukarta hai k ye jhoota hai.[13] Lehaza is kay liye aag ka bichona bichao, aag ka libas pehnao, aur is kay liye aag ki taraf derwaza khol do, fermaya phir is tek wahan ki germi aur loo (garm hawa) aati hai. [14] Fermaya, is per is ki qabr tang ho jati hai, hata k wahan is ki pasliyan idhar ki udhar ho jati hain[15].

Phir us pe andhay behray farishtay musallat hotay hain[16], jin k paas lohay kay hathoray hotay hain, agar in say pahar ko mara jaye to woh bhi mitti ho jaye, is say isay martay hain aisi mar jis say jin o ins (insaan) kay siva mashriq o maghrib ki makhlooq sunti hai[17], jis say woh mitti ho jata hai, phir us main roh lotayi jati hai. [18]

(Ahmad, Abu Da’ud)

Sharah:

  1. Yahan bithana bhi ghair hissi hai, murda khanay main kafir ki lashain humare samne peri rehti hain, magar farishtay isay bitha ker imtehan le ker azab main griftaar ker jatay hain aur humain pata bhi nahi lagta, jaise humare samnay sonay wala badkhwabi main takleef pa raha hai ghabra raha hai magar humain khabar nahi.
  2. Ye sawal jawab arabi zuban main hotay hain, maut kay baad sab ki zuban arabi ho jati hai, magar murda apni zindagi ki zuban bhi samjhta hai. Hazoor (SalAllaho Aliehe Waslam) zindagi main tamam zubanain jantay the, hatta k lakri o pathar ki zubanain bhi, janwar Hazoor (SalAllaho Aliehe Waslam) say feryad kertay the, aur aap (SalAllaho Aliehe Waslam) ab bhi her zuban say waqif hain. Hazoor (SalAllaho Aliehe Waslam) kay roza per her feryadi apni zuban main arz marooz (kehna sun’na) kerta hai wahan tarjuma ki zaruret nahi perti.
  3. Ye sawal khushi ka hai, yani aye banday is nazuk moqa per tu nay inhain kaise pehchan liya? aur tu imtehan main kamyab kaise ho gaya?
  4. Yani quran majeeb ne mujhe khud sikhaya hai, ulama kay zeriye is say aqayed aur amaal hasil kiye lehaza ye jawab ulama kay liye bhi drust hai aur jahilon kay liye bhi, is jawab say maloom hua k qabr main Hazoor (SalAllaho Aliehe Waslam) ki pehchan imani rishta say ho gi chahay Hazoor (SalAllaho Aliehe Waslam) ko dekha ho ya na dekha ho, khayal rahay k momin aik lehaz say Hazoor (SalAllaho Aliehe Waslam) say quran ko janta hai aur dusray lehaz se quran se Hazoor (SalAllaho Aliehe Waslam) ko pehchanta hai.
  5. Hadees main arabi lafz “Abdi” istemaal hua hai, is say maloom hua k ye kalam rab ka hai, jisay banda aaj pehli bar apnay kaan se sunta hai, is kalam ko sun ker jo khushi banday ko hoti hai woh byan nahi ho sakti. “sacha hai” k ye mani hain k dunya main bhi sacha raha aur aaj bhi sach bola.
  6. Pehle arz ho chuka hai k jannat ki naimatain pohanchti hain magar banda wahan nai pohanchta, banday ka jannat main pohanchna hashar (qayamat) kay baad ho ga.
  7. Ye hadees 70 gaz farakhi (wus’at) ki tafseer hai.
  8. Kis museebat say kafir ki jaan nikelti hai, phir usay dunya chornay ka sadma, azab kay farishton ki haibat (dehshat) ka, aienda azab ka der, sab jama ho jatay hain, momin ko is main se kuch bhi nahi hota.
  9. Maloom hua k jin logon ne dunya main Hazoor (SalAllaho Aliehe Waslam) say rishta e ghulami na jora, agarcha woh toheed per qayem rahay magar qabr main toheed waghaira sab ka sab bhool gaye. Kyun k ye jawab kafir ka ho ga.
  10. Yani isay ye bhi yaad na raha k dunya main maine islam kay siva kon sa deen apnaya tha. Kyun k saray kufr shaitani deen hain, jin ki bunyad nafsani hai, mertay he shaitan sath chor gaya, nafs toot gaya, jab jar (Root) he kat gayi to shakhain kaise baqi rehain.
  11. Maloom hua k kafir mayyet ko bhi Hazoor (SalAllaho Aliehe Waslam) ka dedaar keraya jata hai, per woh pehchan nahi sakta, kyun k in ki pehchan nazar se nahi balkay dil ki nazar say hoti hai. Nabeena sahaba ne Hazoor (SalAllaho Aliehe Waslam) ko dekh liya, ankh wala kafir Hazoor (SalAllaho Aliehe Waslam) ko na dekh sakay ga.
  12. Is jawab se woh log ibrat pakrain jo Nabi (SalAllaho Aliehe Waslam) ko apnay jaisa bashar aur bara bhai kehnay ko imaan samjhte hain, agar is say imaan mil jata to ye kafir keh sakta tha k ye aik bashar hain ya meray baray bhai hain. Hazoor (SalAllaho Aliehe Waslam) ko bashar man’nay per nijat nahi, Nabi man’nay per nijat hai. Aap (SalAllaho Aliehe Waslam) ko bashar to abu jahl bhi manta tha.
  13. Kyun k ye kehta hai k main inhain nahi janta jab k zindagi main inhain jadugar, shayer (poet), apne jaisa bashar, bara bhai kehta tha, aur yahan kehta hai k main janta he nahi, jis ko waqi Hazoor (SalAllaho Aliehe Waslam) ki nabuwat ki itela na pohanchi ho, us kay liye sirf aqeeda toheed kafi hai aur us say ye sawal jawab bhi nahi, laiken Hazoor (SalAllaho Aliehe Waslam) ki nabuwat mashriq o maghrib main phail chuki ab jo jaan bujh kay is say ghafil raha woh mujrim hai.
  14. Yani dozakh ki aag kay sholay, dhuan, balkay wahan kay sanp bichu bhi aur garm hawa bhi, ba’az qabron main ye cheezain dekhi bhi gayi hain. Allah ki panah.
  15. Ye tangi bhi ta qayamat rehti hai, jaise k germi aur aag.
  16. In azab kay farishton ka naam zubaniah hai, andhay behray say murad sakht dili, berehmi aur laperwahi hai k is ki takleef dekh ker rehm nahi kertay, aah o baka sun ker kaan nahi dhartay, werna andha behra hona aib hai, jis say farishtay pak hain.
  17. Jin o ins say murad awam hain, maqbuleen ye aah o baka sunte bhi hain balkay azab e qabr dekhte bhi hain.
  18. Yani dunya main sakht takleef  main jaan nikli thi, aise he wahan bhi ho ga k hathoray ki her choat per jaan niklay gi, phir dali jaye gi, isi liye qayamat main kafir arz kerain ge, khudaya tu ne humain bar bar maut o zindagi di.

Popularity: 100% [?]

Post to Twitter Tweet This Post

Munkar nakeer kay sawalat (1 of 2)

Hadees 59:

Riwayat hai Hazrat Bara ibn Azib say, fermatay hain k fermaya Nabi (SalAllaho Aliehe Waslam) nay:

Musalman say jab qabr main puch gach hoti hai to woh gawahi de uth’ta hai k Allah kay siva koi mabood nahi, Muhammad (SalAllaho Aliehe Waslam) Allah kay rasool hain. [1]

To yeh he rab ka ferman hai k Allah mominon ko mazboot baat per qayem rekhta hai, dunyawi zindagi main aur akhirat main. [2]

Aur Hazoor (SalAllaho Aliehe Waslam) say aik riwayat ye hai k fermaya k ye ayat azab e qabr kay mutal’liq nazil hui [3] “Murday say kaha jata hai k tera rab kon to woh kehta hai k mera rab Allah aur meray nabi Muhammad (SalAllaho Aliehe Waslam) hain” [4]

(Muslim, Bukhari)

Sharah:

  1. Puchnay walay munkar nakeer do farishtay hain jo toheed o risalat aur deen ka imtehan laite hain.
  2. Yahan akhirat say murad qabr hai yani qabr main koi sakhs apni koshish say kamiyab nahi ho sakta, sirf Allah kay karam say kamiyabi milay gi. Yani mominon ko zindagi aur qabr main kalma shahadat per Allah Ta’ala he sabit qadam rekhta hai werna dunya kay bohut say halaat aur qabr kay sakht sawalat isay phansnay walay hain.
  3. Yani qabr kay azab o sawab kay saboot main, werna ye ayat mominon kay baray main ayi hai jo azab e qabr say mahfooz hain.
  4. Dunya main imtehan (exam) kay sawalat pehle chupaye jatay hain ta k koi jawab soach na laye. Humare Hazoor (SalAllaho Aliehe Waslam) nay us imtehaan kay sawalat bhi bata diye aur in ka jawabat bhi beta diye. Allah keray us waqt ausaan (senses) tikhanay rahain aur ye bataye huye jawabat yaad aa jain. Ameen.

Popularity: 6% [?]

Post to Twitter Tweet This Post

Azaab e Qabr

Azab e Qabr kay mutal’liq chand (kuch) masayel yaad rekhne chahiye:

  1. Yahan qabr say murad alam e barzakh hai, jis ki ibteda her shakhs ki maut say hai aur inteha qayamat per, urfi (zahiri) qabar murad nahi, lehaza jo murda dafn na hua ho, balkay jala diya gaya ya dabo diya gaya ya usay shair (lion) kha gaya, usay bhi qabr ka hisab o azab ho ga.
  2. Azab e qabr ka saboot bohut si ayaat aur beshumar ahadees say hai. Lehaza azab e qabr ka munkir gumrah hai.
  3. Qabr main sirf imaan ka hisab hai, hashar main imaan o amaal donon ka.
  4. Hisab e qabr humare Hazoor (SalAllaho Aliehe Waslam) kay zamanay say shiru hua, pichli ummaton pe na tha, na un ko apnay nabi ki pehchan kerayi jati thi.
  5. Hisab e qabr 8 logon se nahi hota:
    1. Nabi
    2. Shaheed
    3. Jihaad ki tayyari kernay wala
    4. Ta’oon  main marnay wala
    5. Ta’oon main sabir
    6. Chotay bachay
    7. Jummah kay din ya raat (jumeraat aur jummah ki dermiyani raat) main marnay walay
    8. Her raat Surah Mulk perhne wala
  6. Hisab e qabr aur azab e qabr main ferq hai, ba’az log hisab e qabr main kamiyab hon gay magar ba’az gunnahon ki wajha say azaab main mubtala hon gay, jaise chughal khor aur ganda (taharat ka ehtmam na kerne wala, Dirty).
  7. Kafir ko azab e qabr dayemi (hamaisha rehne wala) ho ga, gunnahgar momin ko arzi, hatta k ba’az ka azab jummah ki shab aatay he khatm ho jata hai. Isi liye dafn say shab e jummah tek qabr per tilawat e quran kerayi jati hai.
  8. Hashar kay baad bandon ko jannat ya dozakh main dakhil ferma ker sawab ya azab diya jaye ga, barzakh main jannat o dozakh ka sawab o azab qabr main pohanchta hai, jism e mayyat wahan nai pohanchta, lehaza donon azabon main ferq hai.
  9. Azab qabr ko hota hai, aur jism us k tabay honay ki wajha se azab main aata hai. Magar hashar kay baad wala azab o sawab rooh o jism donon ko ho ga.

Azaab e qabr say mutalliq ahadees aur sharah agli posts main byan ki jayain gi INSHALLAH.

Popularity: 17% [?]

Post to Twitter Tweet This Post

Taqdeer ki deegar ahadees

Bismillah

Hadees 56:

Riwayat hai Hazrat Matr bin Ukamis, fermatay hain fermaya Rasool Allah (SalAllaho Aliehe Waslam) nay:

Jab Allah Ta’ala kisi banday kay mutal’liq zameen main marnay ka faisla ferma daita hai, to us kay liye wahan zaruri kaam daal daita hai.

(Ahmad, Tirmizi)

Sharah:

Kaam dunyawi ya deeni. Ba’az log zyarat e roza kay liye, ya hajj kay liye Makkah ya Madina jatay hain aur wahan inteqaal ho jata hai. Aisi hajat bhi mubarak aur maut bhi.


Hadees 57:

Riwayat hai Abu Darda say, fermatay hain k

Hum Hazoor (SalAllaho Aliehe Waslam) ki bargah main thay aur jo kuch hota hai us ka tazkarah ker rahay the. [1] Rasool Allah (SalAllaho Aliehe Waslam) nay fermaya k, agar tum suno k pahar apni jagha say tal gaya hai to maan lo, aur agar suno k koi admi jabilli (fitri) adat say badal gaya hai to na mano, phir usi taraf laut jaye ga jis per paida hua. [2]

(Ahmad)

Sharah:

  1. Ye k waqiyat e alam  guzishta faislay kay mutabiq ho rahay hain ya itefaqan. Ye tazkarah manazra kay rang main na tha balkay tahqeeq kay liye  tha, isi liye Hazoor (SalAllaho Aliehe Waslam) suntay rahay, mana na fermaya, balkay aik masla ki tahqeeq ferma di. Maloom hua k ilm e kalaam perhna mamnu nahi balkay masla e taqdeer main bahs kerna mana hai, jaisa k guzishta ahadees say maloom hua.
  2. Khulasa e masla ye hai k waqiyat e alam guzishta faislay kay mutabiq ho rahay hain aur woh faislay atal hain, jin ki tabdeeli mumkin nahi. Khayal rahay k insaan ki do halatain hain, zaati aur wasfi. Wasfi halaat din raat badaltay rehtay hain.

Hadees 58:

Riwayat hai Umm e Salma say, unhon ne arz kiya.

Ya Rasool Allah (SalAllaho Aliehe Waslam) Aap ko her saal us zehreeli bakri ki takleef hoti hai jo Aap (SalAllaho Aliehe Waslam) nay (khybar main) kha li thi. [1]

Fermaya, mujhe is kay siva kuch nahi pohanchi jo meray muqaddar main us waqt likh di gayi jab Hazrat Adam apnay khameer main thay.

(Ibn e Maja)

Sharah:

  1. Aik yahoodi nay khybar main dhokhay say bakri ka zehr alood gosht Hazoor (SalAllaho Aliehe Waslam) ko khila diya tha, ba’az sahaba nay bhi kha liya tha jo shaheed ho gaye, Allah kay fazal say Hazoor (SalAllaho Aliehe Waslam) mahfooz rahay, magar her saal zehr ki takleef hoti thi. Hata k wisaal kay waqt bhi is zehr kay asaar namudar huye the.
  2. Yani ye nahi keha ja sakta ha Hazoor (SalAllaho Aliehe Waslam) khybar na jatay to zehr na khatay, wahan jana zehr khana sab kuch likha ja chuka tha.

Popularity: 27% [?]

Post to Twitter Tweet This Post

6 Admiyon per Allah aur Nabi ki lanat

Bismillah

Hadees 55:

Riwayat hai Hazrat Ayesha say, fermati hain fermaya Rasool Allah (SalAllaho Aliehe Waslam) nay:

6 Admi woh hain jin per main nay aur Allah nay lanat ki, aur her Nabi maqbool-ad-dua (jis ki dua maqbool ho) hai [1]:

  1. Allah ki kitab main zyad’ti kernay wala [2]
  2. Allah ki taqdeer ka inkari [3]
  3. Jabran qabza jamanay wala ta k unhain zaleel keray jinhain Allah nay izzet di [4] Aur unhain izzet de jinhain Allah nay zaleel kiya [5]
  4. Aur Allah kay haram ko halaal samjhnay wala [6]
  5. Aur meri aal kay mutal’liq woh baatain halaal samjhnay walay jinhain Allah nay haram kiya. [7]
  6. Aur meri sunnat ko chornay wala [8]

(Behqi)

Sharah:

Lanat kay mani hain duri. Jab is ka fa’el (kernay wala) banda ho to mani hote hain duri e rehmat ki bad’dua kerna, aur agar fa’el Rab ho to mani hote hain rehmat say dur kerna. Kisi musalman per naam lay ker lanat kerna jaiz nahi, wasf e ajmali say lanat jaiz hai, jaise jhooton aur zaniyon per khuda ki lanat, un kuffar per bhi lanat jaiz hai jin ka kufr per merna yaqeeni ho chuka, jaise abu jahl aur abu lahb waghaira.

  1. Yani her Nabi ki dua qabool hoti hai, agar un ki dua khilaf e taqdeer ho to un ko dua mangnay say rok diya jata hai, rad woh bhi nahi hoti.
  2. Quran ho ya koi aur asmaani kitab, lafzi zyad’ti ho ya manwi, is say woh log ibrat pakrain jinhon ne tafseer e quran ko khail samjh liya hai, aur ayat k woh mani rekhtay hain jo aaj tek kisi momin kay khayal main bhi na the.
  3. In ka zikr pehle aa chuka hai (click here)
  4. Yani logon ki khilaf e marzi un ka najaiz hakim ban janay wala, jaisa aaj kal ho reha hai. Khayal rahay k qaum ya mulk kay bigarnay ki surat main us ko sanbhalnay kay liye hukumat hath main laina sunnat e Hazrat Yousaf hai.
  5. Yahan woh hakim murad hain jo mulk ko bigarnay kay liye hakim banain, fasiqon ko martabay dain, ulama aur oliya ko zaleel kerne ki koshish kerain.
  6. Yani Makkah Mukarrama ki hadood main fitna, fasad, shikar, darkht girana waghara. Woh kaam kernay wala jisay ilm kay zeriye se wahan haraam kaha gaya hai.
  7. Yani Hazoor (SalAllaho Aliehe Waslam) ki aulad ki behurmati, un per zulm o sitam kernay wala. Aulad e Rasool (SalAllaho Aliehe Waslam) aulad e Fatima Zahra hai, in ki tazeem deen main dakhil hai. Jab qurb e Kaaba ki wajha say haram ki zameen ka ehtraam hai, to qarabat e Mustafa (SalAllaho Aliehe Waslam) ki wajha se sadaat karaam ka ehtraam yaqeenan lazim hai. Ya is jumla kay mani ye bhi ho saktay hain k jo meri aulad ho aur Allah kay haraam ko halal janay us per lanat hai. Agarcha jurm sab kay liye bura magar sadaat kay liye zyada bura, is say sadaat hazraat ko ibrat pakarni chahiye, woh apnay baap dadaon ka namuna banain, sirf syed honay per fakhr na kerain.
  8. Haqeer jaan ker sunnat e Rasool Allah (SalAllaho Aliehe Waslam) chornay wala. Sunnat mo’akkada (jis ki takeed ki gyi) ho ya ghair mo’akkada,  za’ida (paida ki hui) ho ya huda (hidayat, seedha rasta), is ko haqeer jan’na mazak urana qat’an kufr hai. Sunnat e huda hamaisha chornay wala Hazoor (SalAllaho Aliehe Waslam) ki aik shifa’at say mahroom hai.

Popularity: 39% [?]

Post to Twitter Tweet This Post

Badmazhabon kay paas baithnay ki mumaniat

BismillahHadees 53:

Riwayat hai Abdullah ibn Umar say, fermatay hain fermaya Rasool Allah (SalAllaho Aliehe Waslam) nay

Qaderya firqa is ummat ka majusi tola (Group) hai. [1] Agar bimar per jain to in ki mizaj pursi na kero aur agar mar jain to in kay janazon main na jao [2]

(Ahmad, Abu Da’ud)

Sharah:

  1. Ummat say murad kalma go hain (qaumi musalman). Majusi ka aqeeda hai k alam kay khaliq do hain, khair ka khaliq Yazdaan aur shar ka Harman, aise he qaderya apnay ko amaal ka khaliq mantay hain, lehaza majusi say badter huye k woh sirf do khaliq mantay hain aur ye lakhon.
  2. Yani in ka mukammal boycott kero, ta k woh tang aa ker toba ker lain, boycott bara mukammal ilaaj hai. Khayal rahay k momin ko bay-deen say aise he alehdagi chahiye k maut o zindagi main in se alag rahay, jaan bachana hai to sanp say bhago, imaan bachana hai to bay-deen say bhago. Qaderya ya to kafir hain ya gumrah, baherhaal in ki sohbat zehr e qatil hai.

Hadees 54:

Riwayat hai Hazrat Umar say, fermatay hain fermaya Rasool Allah (SalAllaho Aliehe Waslam) nay

Qaderiyon kay sath nashist o berkhast (uthna baithna) na rakho [1] na is say kalaam main ibteda kero [2]

(Abu Da’ud)

Sharah:

  1. Muhabbat aur mail milaap kay tor per in k sath na utho baitho. Tableegh ya manazra kay liye pukhta (solid) imaan walay ulama ka in kay paas jana jaiz hai, kamzoor imaan walay musalman baherhaal in say bachain. Mojuda daur k qadiyanon, aur rawafiz (Woh groh (Group) jo apne sardar ko chor de. Is se murad woh pairwan (Followers) e Zaid bin Ali bin Husain hain, jinhon ne aap ka sath chor diya tha.) , sab ka yehi hukam hai. Agar musalmaan is hadees per amal kerte to ye deen (firqe) phailte he nahi.
  2. Yani inhain hakim na banao, na in se baat cheet aur manazra waghaira ki ibetda kero ta k fitna na ho, is say pata laga k bay-deenon kay jalson main jana un ki kitabain perhna, unhain dawat khilana sab na-jaiz hai.

Popularity: 3% [?]

Post to Twitter Tweet This Post

Taqdeer main behs kerna mana hai

BismillahHadees 51:

Riwayat hai Hazrat Abu Huraira say:

Hazoor (SalAllaho Aliehe Waslam) humare paas tashreef laye halan k hum masla e taqdeer per jhagar rahay the. [1]

To Aap (SalAllaho Aliehe Waslam) naraz huye hata k chehra anwar surkh ho gaya goya k rukhsaron main anaar kay danay nichor diye gaye hain. [2]

Aur fermaya, kya tumhain is ka hukam diya gya hai ya main isi kay sath tumhari taraf bhaija gya?[3]

Tum say pehle logon nay jab is masla main jhagray kiye to halak he ho gaye. [4]

Main tum per lazim kerta hon, lazim kerta hon k is masla main na jhagro. [5]

(Tirmizi, Ibn e Maja)

Sharah:

  1. Jab jo kuch hum kerte hain, irada e Ilahi se keret hain, to hum majboor huye, phir is per sawab aur azab kaisa? waghaira jaise aaj kal ki aam guftgu hain.
  2. Yani ghazab kay asaar chehray per namudar ho gaye, Hazoor (SalAllaho Aliehe Waslam) ka ye ghussa nafs kay liye nahi tha balkay Allah kay liye aur sahaba ko taleem daine ki gharz say tha, ye ghussa bhi ibadat hai jis per bara sawab hai. Is se maloom hua k ustaad shagir per aur peer mureed per naraz ho saktay hain.
  3. Yani jin cheezon ki tumhain zaruret hai, aur jis ka sawal tum say qabr o hashar main ho ga un kay jawab hasil kernay ki koshish kero, masla taqdeer per behs kerne kay tum jawabdeh nahi, na tum say is ka sawal ho ga.
  4. Yahood o nasara ki ba’az jamatain ya deegar anbiya ki ummatain jo masla qaza o qadr main behs ker k imaan tor baithe aur azab e Ilahi aa gaya.
  5. Is say maloom hua k masla taqdeer main bay samjhay behs kerna aur awam kay dil main is kay mutal’liq shubahat paida kerna haram hai, aise he nasamjh logon ka is main zyada ghaur kerna bhi mana hai, laiken is maslay ki haqaniyat per dalayel qayem kerna, aiteraaz kerne walon kay shubahaat dur kerna mana nahi balkay tabligh hai, magar ye ulama ka kaam hai awam ka nahi.

Hadees 52:

Riwayat hai Hazrat Ayesha say, fermati hain k main nay Nabi (SalAllaho Aliehe Waslam) ko fermatay suna

Jo masla e taqdeer main behs kere ga us say qayamat main is ki baz purs ho gi, aur jo is per behs na keray ga us say pursish na ho gi.

(Ibn e Maja)

Popularity: 10% [?]

Post to Twitter Tweet This Post

Page 2 of 5«12345»
Get Adobe Flash playerPlugin by wpburn.com wordpress themes