Shab e Miraaj ki Ibadaat

Shab-e-Miraj-ki-ibadat-1

Shab-e-Miraj-ki-ibadat-2

Shab-e-Miraj-ki-ibadat-3

Shab-e-Miraj-ki-ibadat-4

Shab-e-Miraj-ki-ibadat-5

Popularity: 15% [?]

Post to Twitter Tweet This Post

Baad e Wafaat Parda

Jab Nabi Karim ki sahabzadi Hazrat Fatima R.A. kay intqal ka waqt qareeb aya, to aap ne Hazrat Asma Bint e Umais R.A. say fermaya,

Mujhe khulay janazay sakht napasand hain, kyun kay in main aurton ki baypardagi hoti hai.

Hazrat Asma ne arz ki,

Main nay Habsha main janaza lay janay ka aik tareeqa daikha hai, ijazat ho to paish keron?

Aap nay ijazat marhamat fermayi. Asma Bint e Umais nay khajur ki chand (چند) shakhain mangwayien aur inhain is tarha khara kar diya jaise charpayi kay charon paye hotay hain. Phir in per aik kapra is tarha daal diya, jo uper se parda karnay k sath sath charon janib say latak kar hifazat ka kaam day raha tha. Isay daikh kar Hazrat Fatima R.A. bohut khush huyien aur phir hasb e wasiyat aap ka aur aap kay baad Hazrat Zainab R.A. ka janaza bhi isi tareeqay say uthaya gya.

Popularity: 20% [?]

Post to Twitter Tweet This Post

Qabil e Rask Maan (ماں)

Hazrat Khansa (خنساء) R.A. sharf e sahabiyat (شرف صحابیت) se serfraz hain. Moharram 14 Hijri main jung e Qadsiya main yeh apne charon (چاروں) jawan baiton k sath tashreef lay gyien. Jis waqt lerayi ka tanur (تنور) puri terha garm hua to baiton ko hukam diya,

Mere bacho! jao aur akhri dam tek rah e haq (راہ حق) main laro (لڑو).

Maan (ماں) ka hukam sunte hi charon (چاروں) bhai ghoron (گھوڑوں) ki bagain (باگیں) uthaye maidan e karzar (میدان کارزار) main tashreef lay gye aur mardana’waar (مردانہ وار) lartay huye yakay baad deegray (یکے بعد دیگرے) shaheed ho gye. Walida nay in ki shahadat ki khabar suni to itmenaan e qalb k sath fermaya,

Allah ka shukar hai kay mere baiton nay peeth nahi phairi aur Allah nay in ki shahadat per sabr (صبر) ka sharf mujhe bakhsha. Us Zaat e Raheem se umeed hai k woh apni rahmat k saye main in shaheedon kay sath mujhe bhi jagha a’taa (عطا) fermaye ga.

Hazrat Umar Farooq R.A. is azeem maan kay qabil e rashk sabr (صبر) say bay’had (بے حد) mutasir huye aur charon (چاروں) sahab’zadon (صاحب زادوں) ki tanhu’aahain (تنخواہیں), in ko a’taa (عطا) fermanay lagay.

Popularity: 21% [?]

Post to Twitter Tweet This Post

Naik Shohar ya maal?

Hazrat Umar bin Abdul Aziz ki zauja, Fatma bint e Abdul Malk kay pas aik baish baha aur bemisl gohar tha, jo un ko un k walid ne diya tha. Ameer ul Momineen ban janay k baad aik roz Hazrat Umar bin Abdul Aziz nay apni Zauja mohtarma se fermaya,

Tum ya to apna tamam zaiwar is gohar samait bait ul maal main jama kara do ya mujhe napasandida qarar day do aur main tumhain khud se juda kar don, kyun kay mujh se nahin daikha jata k main tum aur tumhara zaiwar aik ghar main hon.

Sa’adat mand zauja nay foran jawab diya,

Aap mera tamam zaiwar shoq se bait ul maal main jama kerwa dijiye, main zaiwar k muqablay main aap ko tarjih daiti hon.

Chunanchay Hazrat Umar bin Abdul Aziz nay un ka tamam zaiwar lay kar bait ul maal main jama kerwa diya. Jab aap ka intqal hua to aap ki zauja ka bhai Yazid bin Malk takht nasheen hua, us nay apni behn say keha,

Ager tum chaho to main tumhara zaiwar bait ul maal say wapis lay kar tum ko de don?

Aap ne is paishkash ko thukra diya aur farmaya, jo cheez main apni marzi say apne shohar ki zindagi main day chuki hon, ab un k intqal k baad bhi wapis nahin lon gi.

Hasil Mutaliya:

Hazrat Umar Bin Abdul Aziz, Hazrat Umar Farooq (R.A.) ki nasl e mubarak se hain. chunkay aap ne hazrat Umar (R.A.) ki misl ru e zameen ko apne adal o insaaf se bher diya tha, lehaza aap ko umar e sani keha jata hai.

Khalifa ban’nay k baad Aap nay mojuda doar k hukamranon kay bar’aks duniya say bilkul kinara kashi ikhtiyar fermatay huye, apna tamam maal o mat’a bait ul maal main jama kerwa diya tha. Is main Allah ki bargah main maqbul ban’nay ki soach bhi kaarferma thi aur awam o khawas ki janib say bad’gumaniyon say mahfuf rehnay ki tadbeer bhi.

Apni zauja kay baray main Aap ki yahi khwahish thi kay woh bhi Allah ki bargah main maqbul ban’nay main rukawat dalnay wali har cheez say dur ho jain, lehaza isi maqsad k tayht unhain qeemti gohar bait ul maal main jama kerwanay ka hukam fermaya, b’surat e deegar unhain alehda honay ki ijazat marhamat fermayi.

Popularity: 19% [?]

Post to Twitter Tweet This Post

Hazoor (SalAllaho Aliehe Waslam) kay ilm o hidayat ki tashbeehat

Hadees 72:

Riwayat hai Hazrat Abu Musa say, fermatay hain fermaya Nabi (SalAllaho Aliehe Waslam) nay:

Meri aur jo kuch mujhe Allah nay day ker bhaija us ki kahawat is shakhs ki si hai jis nay kisi qaum kay paas aa ker kaha k main nay apni ankhon say aik lashkar dekha hai [1]. Main khula deranay wala hon [2]. Bacho Bacho. Us ki qaum say aik tolay (Group) nay us ki baat maan li aur andhaire mu uthay aur barwaqt nikel gaye to bach gaye . Aur un kay aik tolay (Group) nay jhutla diya woh usi jagha rahay phir sawairay hi lashkar in per toot para, inhain halak ker kay tehes nehes ker diya [3]. Ye he is ki misaal hai jis nay meri ita’at ki to meray laye huye ki itba’ ki aur is ki jis nay meri nafermani ki aur meray laye huye haq ko jhutla diya.

(Muslim, Bukhari)

Sharah:

  1. Ye tashbeeh e murakkab (تشبیہ مرکب) hai puray waqiya ko puray waqiya kay sath mushabehat di gyi hai. Is shakhs say murad woh ameen aur sacha admi hai jis ki baat per logon ko aitemaad ho, Hazoor (SalAllaho Aliehe Waslam) ki sachayi zahoor e nabuwat say phele he her khas o aam main mashoor ho chuki thi.
  2. Arab main dastoor tha k khaternaak dushman ki itela’ dainay wala apna kurta lathi (لاٹھی) per tang ker logon main ailaan kerta tha k hoshiyar ho jao isay nazeer e uryan (نذیر عریاں) kehtay the, yani nanga deranay wala.
  3. Yani sun’nay walay do tolay ban gaye, aik tolay nay is nazeer ka aitebaar kiya aur dushman lashkar kay hamlay say qabl he bhag gaye, ye nafa’ (faiday) main rahay.
  4. Jaise nijaat aur halakat ka daro-madar is ailaan kernay walay ki tasdeeq ya takzeeb hai, aise he akhirat kay azaab say bachnay na bachnay ka daro-madaar Hazoor (SalAllaho Aliehe Waslam) kay man’nay aur na man’nay per hai. Azaab e ilahi goya lashkar hai, maut say pehlay toba ker laina goya berwaqt khaternaak jagha say nikel jana hai, aur akhirat tek gunnahon main data (ڈٹا) rehna aur Hazoor (SalAllaho Aliehe Waslam) ko jhutlana goya khaternaak jagha main reh ker dushman kay hathon mara jana hai.

Hadees 73:

Riwayat hai Hazrat Abu Huraira say, fermatay hain fermaya Rasool Allah (SalAllaho Aliehe Waslam) nay:

Meri kahawat us shakhs ki si hai [1] jis nay aag roshan ki, jab aag nay ird gird ko chamka diya to patangay, aur jo aag main gira kertay hain (janwar) is main girnay lagay [2]. Aur inhain roknay lega aur woh janwar is pe ghalib aaye jatay hain, aag main giray jatay hain [3]. Chunachay (چنانچہ) main tumhari kamar pakar ker aag say bachata hon aur tum is main giray jatay ho.[4]

Ye Bukhari ki riwayat hai, Muslim ki riwayat main isi terhan hai magar is kay akhir main fermaya k Hazoor (SalAllaho Aliehe Waslam) nay fermaya. Ye meri tumhari misaal hai, main tumhain kamar say pakar ker aag say bachata hon, aag say bhag aao. Magar tum mujh per ghalib aaye jatay ho aur is main giray jatay ho.

(Muslim, Bukhari)

Sharah:

  1. Ye bhi tashbeeh e murakkab hai. Allah nay dunya aur yahan ki uljhanon ko deen ka zeriya bananay kay liye paida fermaya, magar logon nay inhain ghalat istemaal ker kay halakat ka zeriya bana liya, jaise koi jungle main musafiron ki hidayat aur roshni kay liye aag jalaye magar patangay isi aag ko apni halakat ka saman bana lain aur hakalat ko apni nijaat samjhain.
  2. Chunachay (چنانچہ) duniya ki lazzatain aag hain aur hum nasamjh banday patangay k is ko ghalat istemaal ker kay apnay ko halak kerna chahtay hain.
  3. Khayal rahay k tashbeeh main aag jalanay wala aur hai, aur bachanay wala aur. Aise he yahan dunya bananay wala Allah hai aur us kay ghalat istemaal say bachanay walay Hazoor (SalAllaho Aliehe Waslam) hain.
  4. Hazoor ka apni ummat ko narmi germi say samjhana bujhana goya in ki kamar pakar ker aag say rokna hai ye rokna ta qayamat rahay ga. Ulama mashayekh ki tableeghain, ghaziyon kay jihaad Hazoor (SalAllaho Aliehe Waslam) ki tableegh hain, is say maloom hua k koi shakhs apni danayi ya apni tajweez kerta aqli ibadaton kay zeriya dozakh say nahi bach sakta jab tek k Hazoor (SalAllaho Aliehe Waslam) ki hidayat ko qabool na keray werna hindu sadhu aur isaayi rahib tark e dunya ker k umar bher ibadatain kertay hain magar dozakhi hain.

Hadees 74:

Riwayat hai Hazrat Abu Musa say, fermatay hain fermaya Rasool Allah (SalAllaho Aliehe Waslam) nay:

Is hidayat e ilm ki misaal jo Allah nay mujhe de ker bhaija [1], is bohut si barish ki terha hai [2]. Jo kisi zameen main pohanchi us ka kuch hissa acha tha jis nay pani choos liya aur ghaas aur bohut chara uga diya, aur ba’az hissa sakht tha [3]. Jis nay pani jama ker liya jis say Allah nay logon ko nafa’ diya k inhon nay khoob piya pilaya aur khaiti ki. Aur aik dusre hissay main pohancha jo chat’yal (چٹیل) tha k pani jama kere aur na ghaas ugaye [4]. Ye us ki misaal hai jo deeni aalim hua aur usay is cheez nay nafa’ diya jo mujhe Allah nay day ker bhaija is nay seekha aur sikhaya [5]. Aur is ki misaal hai jis nay is per sar na uthaya aur Allah ki woh hidayat qabool na ki jo mujhe day ker bhaija gaya. [6]

(Muslim, Bukhari)

Sharah:

  1. Is say isharatan maloom hua k ilm aur hidayat aik nahi, kabhi ilm hota hai hidayat nahi hoti, jaise is ummat kay bay’deen ulama. Kabhi hidayat naseeb ho jati hai bohut sa ilm nahi hota, jaise woh awam jo bay ilm hain magar imaandar hain. Kabhi ilm aur hidayat donon jama ho jatay hain, jaise ulama e deen hain. Hidayat ilm say afzal hai isi liye is ka zikr pehle hua. Ilm kitabon say milta hai, hidayat kisi ki nazar say.
  2. Is say isharatan maloom hua k Hazoor (SalAllaho Aliehe Waslam) kay yahan ilm o faizaan ki kami nahi, tamam dunya faiz lay lay to ghat’ta (گھٹتا) nahi, koi na le to bekaar bachta nahi, jaise suraj ki roshni aur badalon ka pani.
  3. Yahan muraad nashaibi zameenain hain jo talaab ban jati hain.
  4. Is tashbeeh ka khulasa ye hai k Hazoor (SalAllaho Aliehe Waslam) goya rehmat ka badal hain, Hazoor (SalAllaho Aliehe Waslam) ka zahiri aur batini faiz aur noorani kalam barish hai. Insaanon kay dil mukhtalif iqsaam ki zameen hain. Chunachay (چنانچہ) momin ka dil qabil e kasht zameen hai, jahan amal aur taqwa kay pauday (پودے) ugtay hain. Ulama aur mashayekh kay seenay goya talaab hain, aur is khazeena kay ganjeena (ذخیرہ ،خزانہ) hain jis say ta’qayamat musalmanon kay imaan ki khaiti sairaab hoti rehay gi. Munafiqeen aur kuffar kay seenay khari zameen hain, na faida uthayain na pohanchayain.
  5. Is tashbeeh say do faiday hasil hote hain aik ye k koi shakhs kisi darja per pohanch ker Hazoor (SalAllaho Aliehe Waslam) say beneyaz nahi ho sakta, zameen kaisi he aala ho aur kitna he acha beej boya jaye magar barish ki mohtaaj hai. Deen o dunya ki sari baharain Hazoor (SalAllaho Aliehe Waslam) kay dam say hain. Dusre ye k ta’qayamat musalman ulama kay hajat mand hain, in ki khaitiyon ko pani in hi talaabon (تالابوں) say milay ga, Hazoor (SalAllaho Aliehe Waslam) ki rehmat in he kay zeriye naseeb ho gi.
  6. Is main isharatan bataya gaya hai k agar kisi ko Hazoor (SalAllaho Aliehe Waslam) ki nabuwat ki khabar na pohanchay to usay aqeeda toheed kafi hai.

Popularity: 30% [?]

Post to Twitter Tweet This Post

Khajuron ki shadi se mana fermana

Hadees 71:

Riwayat hai Rafe’ bin Khadeej say, fermate hain

Nabi Allah (SalAllaho Aliehe Waslam) Madina main tashreef laye, ahl e Madina khajuron (dates) ki shadi kertay the [1]. To fermaya tum ye kya kertay ho? Wo bolay, hum pehlay say aisa kertay aaye hain. Fermaya, mumkin hai k tum ye na kero to acha ho [2].

Logon ne ye shadi chor di, phal kam ho gaye. Unhon nay ye waqiyah Aap (SalAllaho Aliehe Waslam) say arz kiya [3]. Fermaya, k main aik bashar hon, jab tum ko kisi deeni kaam ka hukam don to usay le lo, aur jab apni raye say kuch kahon to main bashar he hon [4].

(Muslim)

Sharah:

  1. Is terhan k nar (male) khajur ki shakh mada (female) khajur main paiwand ker daite the, jis say phal zyada aur achay hote the, humare yahan isay darakht (tree) ya bagh ki shadi kaha jata hai, is moqa per bagh walay bari khushi manatay hain. Khayal rahay k darakht main bhi nar aur mada hote hain, ba’az ko log jante hain, ba’az ko nahi. Nar darakht say hawa mass ho ker mada per legti hai to us say phal aata hai.
  2. Yani tum is mushaqqat say bach jao, aur phal bhi jo muqaddar main hain milain ge aur tumhain tawakkul ka darjah naseeb ho ga.
  3. Ba’az ulama nay fermaya k in hazraat nay  sabar say kaam na liya balke jald he shikayat ker di. Agar tawakkul ker kay kuch roz nuqsaan bardasht ker laite to bari barkat dekhte. Hazoor (SalAllaho Aliehe Waslam) is amal say bekhabar na thay, balke unhain tawakkul ka sabaq diya tha. Hazrat Yusuf A.S. nay kabhi kashtkari nahi ki thi magar badshah e misar (egypt)  say fermaya k gandum bhusa say alag na kero ta k kharab na ho aur qeht main kaam aaye. Naiz Aap ne kabhi saltanat na ki thi magar badshah e misar say fermaya k mujhe khazanon ka hakim bana de main sab kuch janta hon sab qeht walon ko sanbhal lon ga. Jab Hazrat Yusuf A.S. ka ilm ye hai to humare Hazoor (SalAllaho Aliehe Waslam) is mamuli baat say kaise bekhabar ho sakte hain.
  4. Yani humare fermaan do terhan kay hain. Sharayi ehkamat aur dunyawi raye shareef. Sharayi ehkamat per amal lazim hai kyun k wahan nabuwat aur nooraniyat ka lehaz hai. Magar raye mubarak ka qabool kerna mustahib hai, na man’na bhi ikhtiyar hai, laiken is ko bura ya haqeer jan’na bhi kufr ho ga. Hazoor (SalAllaho Aliehe Waslam) ko khud apnay aap ko bashar fermana Aap (SalAllaho Aliehe Waslam) ka kamal hai. Hum agar ye lafz ahanat ya barabri kay daway se kehain to kafir ho jain ge. Shaitan Nabi ki haqarat ker kay aur unhain bashar keh ker he kafir hua hai.

Popularity: 25% [?]

Post to Twitter Tweet This Post

Hazoor ki ita’at main Allah ki ita’at hai

Hadees 68:

Riwayat hai Hazrat Abu Huraira say, fermatay hain fermaya Rasool Allah (SalAllaho Aliehe Waslam) nay:

Munkir kay siva meri sari ummat jannat main jaye gi. [1]

Arz kiya gaya munkir kon hai? fermaya, jis nay meri fermaberdari ki behisht (jannat) main jaye ga, jis nay meri nafermani ki munkir hua. [2]

(Bukhari)

Sharah:

Yahan ummat say murad ummat e ajabat hai, jinhon nay Hazoor (SalAllaho Aliehe Waslam) ki tableegh ko qabool ker kay kalma perh liya werna Hazoor (SalAllaho Aliehe Waslam) ki ummat e dawat to sari khalqat hai.

Inkar say murad amli inkar hai aur is main gunnahgar musalman dakhil hain, aur jannat main dakhilay say murad aula (اولی) dakhila hai, yani muttaqi momin aula (اولی) dakhila kay mustahiq hain fasiq is kay mustahiq nahi, lehaza hadees bilkul wazeh hai aur agar inkar say murad ieteqadi inkar murad ho to matlab ye ho ga k musalman jannat ka mustahiq hai kafir nahi, magar pehle mani zyada shahi hain.


Hadees 69:

Riwayat hai HazratAnas say, fermatay hain k:

Teen tolay (group) Nabi (SalAllaho Aliehe Waslam) ki biwiyon ki khidmat main Hazoor (SalAllaho Aliehe Waslam) ki ibadat maloom kernay kay liye hazir huye. [1]

Jab unhain ibadaat ki khabar di gaye to ghaliban inhon ne isay kuch kam samjha [2]. To bolay k humain Nabi (SalAllaho Aliehe Waslam) say kya nisbat, Rab Ta’ala un ki agli pichli sab laghzishain bakhsh dain [3].

Lehaza in main se aik bola k “Main hamaisha sari raat namaz perhon ga.” [4]

Dusra bola “Main hamaisha din main roza rehon ga, kabhi iftar na keron ga.” [5]

Teesra bola “Main auraton say alag rahon ga kabhi nikah na keron ga.” [6]

Phir Nabi (SalAllaho Aliehe Waslam) in kay paas tashreef laye aur fermaya tum he woh ho jinhon ne aisa aisa keha, khabardar raho k Allah ki qasam main tum sab main Allah say zyada dernay wala  aur khof kernay wala hon, laiken main rozay bhi rekhta hon, iftar bhi kerta hon, namaz bhi perhta hon, sota bhi hon, biwiyon se nikah bhi kerta hon[7]. Jis nay meri sunnat say mu mora woh mujh say nahi[8].

(Muslim, Bukhari)

Sharah:

  1. Hazoor (SalAllaho Aliehe Waslam) ki raat ki ibadaat maloom kernay kay liye hazir huye, werna din ki ibadat to woh jantay he the.
  2. Kyun kay in ka khayal tha Hazoor (SalAllaho Aliehe Waslam) sari raat jagtay he hon ge aur siva ibadat kay koi kaam na kertay hon ge magar bataya ye gaya k shab main sotay bhi hain jagtay bhi hain, aur jagtay main ibadat bhi kertay hain aur dunyawi kaam bhi kerte hain, tab inhain ye khayal guzra.
  3. Subhan Allah kya adab hai, k is kami e ibadat ko Hazoor (SalAllaho Aliehe Waslam) ki azmat e shan ki daleel banaya aur wajha ye banayi k ibadat ki zyad’ti gunnah muaf kerwanay kay liye chahiye. Hazoor (SalAllaho Aliehe Waslam) bay gunnah hain agar bilkul ibadat na kerain to bhi durust hai.
  4. Yani her raat tamam shab baidar reh ker namaz perhon ga.
  5. Tamam din rozay rekhon ga, siva mumaniyat kay 5 dinon kay. Shawal ki pehli, baqr eid ki daswien gyarhwien barhwien terhwien (10-11-12-13), k in main rozay rekhna haram hain.
  6. Kyun k nikah he Allah say ghaflat e dunya main phansnay ka zeriya hai, isi wajha se talb e muash ki fikr hoti hai.
  7. Subhan Allah kya nafees taleem hai k Hazoor (SalAllaho Aliehe Waslam) nay hum ko isayi aur saadhuon ki terhan tarik e dunya (تارک دنیا) na banaya balkay duniya ko deen banaya. Kyun k Hazoor (SalAllaho Aliehe Waslam) ka her kaam sunnat hai, lehaza iftar bhi sunnat, raat ko tahajjud perhna aur sona bhi sunnat, nikah kerna aur aulad hasil kerna, dunyawi karobar kerna, sab he sunnat aur ibadat hain jis per sawab milta hai, INSHALLAH momin ko in sab kamon per sawab hai.
  8. Yani jo kisi sunnat ko bura janay woh islam se kharij hai, jo bila uzr (wajha) tark e sunnat ka aadi ho jaye woh meray perhaizgaron ki jamaat say kharij hai. Khayal rehay k nikah aksar sunnat hai, kabhi farz aur kabhi haram bhi ho jata hai. Hazoor (SalAllaho Aliehe Waslam) ki her sunnat per amal ki koshish kerni chahiye.

Hadees 70:

Riwayat hai Hazrat Ayesha say, fermati hain k

Nabi (SalAllaho Aliehe Waslam) nay koi kaam kiya, phir us ki ijazat ho gayi [1]. Magar aik guroh (group) nay us say perhaiz kiya[2]. Ye khabar Hazoor (SalAllaho Aliehe Waslam) ko pohanchi to Aap (SalAllaho Aliehe Waslam) nay khutbah perha aur Allah ki hamd  ki, phir fermaya:

In logon ka kya haal hai k un cheezon say bachtay hain jo main kerta hon. Allah ki qasam main in sab say zyada Allah ko janta hon aur sab say zyada Allah say khof wala hon. [3]

(Muslim, Bukhari)

Sharah:

  1. Yani Hazoor (SalAllaho Aliehe Waslam) nay koi mubah dunaywi kaam kiya jis ki wajha se logon kay liye mubah nahi balkay sunnat ban gaya.
  2. Ye samjh ker k agarcha jayez ye bhi hai magar aisa ka na kerna taqwa hai.
  3. Yani taqwa aur perhaiz gari Hazoor (SalAllaho Aliehe Waslam) ki ita’at main milay gi, jaise raat ko khof e Ilahi main rona sunnat aur ibadat hai, aise he araam say sona bhi sunnat aur ibadat hai, kyun k donon Hazoor (SalAllaho Aliehe Waslam) kay tareeqay hain.

Popularity: 41% [?]

Post to Twitter Tweet This Post

Bidat ki tehqeeq

Hadees 65:

Riwayat hai Hazrat Ayesha (RA) say, fermati hain fermaya Rasool Allah (SalAllaho Aliehe Waslam) nay:

Jo ijaad keray humaray deen main woh tareeqa jo is deen say nahi, woh mardood hai.

(Bukhari, Muslim)

Sharah:

Yani woh ijaad kernay wala mardood hai ya us ki ye ijaad mardood hai. Yani jo shakhs islam main khilaf e islam aqeeday ijaad keray woh shakhs bhi mardood hai aur woh aqayed bhi batil, lehaza rawafiz, qadiyani, qaderiya waghaira aise 72 firqay jin kay aqayed islam hain, sab batil hain.

Hadees ka lafz (لیس منہ) say murad quran o hadees kay mukhalif hain, yani jo koi deem main aise amal ijaad keray jo deen yani kitab o sunnat kay mukhalif hon, jis say sunnat uth jati ho woh ijaad kernay wala bhi mardood aur aise amal bhi batil, jaise urdu main khutba o namaz perhna, farsi main azan daina waghaira, is ki tafseer woh hadees hai jo agay aa rehi hai k jo koi bidat ijaad keray to Allah sunnat ko utha laita hai.


Hadees 66:

Riwayat hai Hazrat Jabir say, fermatay hain fermaya Rasool Allah (SalAllaho Aliehe Waslam) nay:

Hamd o Salaat (حمد و صلٰوہ) kay baad yaqeenan behtereen baat Allah ki kitab hai aur behtereen tareeqa (ھدی) Muhammad Mustafa (SalAllaho Aliehe Waslam) ka tareeqa hai. Aur badtareen cheez deen ki bidatain hain aur her bidat gumrahi (ضلالتہ) hai

(Muslim)

Sharah:

Yani Allah ka kalaam tamam kalamon per aisa he buzurg hai jaise khud Allah apni makhlooq per.Hadi (ھدی) kay mani hain achi khaslat, Hazoor (SalAllaho Aliehe Waslam) ki seerat achi hai kyun k Rab ki taraf say hai, humare kaam aur kalam nafsani aur shaitani bhi hotay hain, magar Hazoor (SalAllaho Aliehe Waslam) ka her qaul o fail rehmani hai, isi liye Hazoor (SalAllaho Aliehe Waslam) kay kisi fail per aiteraaz kufr hai k woh Rab per aiteraaz hai.

Bidat kay lughwi mani hain nayi cheez. Ye teen terhan say ho sakti hai

  1. Naye aqeeday, isay bidat aiteqadi (بدعت اعتقادی) kehtay hain.
  2. Woh naye amaal jo Quran o Hadees kay khilaaf hon aur Hazoor (SalAllaho Aliehe Waslam) kay baad ijaad hon.
  3. Her naya amal jo Hazoor (SalAllaho Aliehe Waslam) kay baad ijaad ho.

Pehle do mani say her bidat buri hai, koi achi nahi. Teesray mani kay lehaaz say ba’az bidatain achi hain, ba’az buri. Hadees main pehlay mani murad hain, yani buray aqeeday, kyun k Hazoor (SalAllaho Aliehe Waslam) nay usay zalalat yani gumrahi fermaya.

Gumrahi aqeeday say hoti hai amal say nahi, benamazi gunnahgar hai gumhra nahi. Rab ko jhoota ya Hazoor (SalAllaho Aliehe Waslam) ko apni terhan samjhna badaqeedgi aur gumrahi hai. Gumrahi main bidat k pane donon mani ka itlaaq (اطلاق: application) hai. Teesray mani main bidat do terhan ki hai. Bidat e hasna (بدعت حسنہ) aur bidat e siyah (بدعت سیہ), yahan bidat e siyah murad hai. Bidat e hasna kay liye kitab ul ilm ki woh hadees hai jo ayenda byan ki jaye gi “Jo islam main acha tareeqa ijaad keray woh baray sawab ka mustahiq hai”. Bidat e hasna kabhi jayez kabhi wajib aur kabhi farz hoti hai.

Ba’az log is hadees kay mani ye kertay hain k jo kaam Hazoor (SalAllaho Aliehe Waslam) kay baad ijaad hon woh bidat hai, aur her bidat gumrahi hai, magar ye mani bilkul fasid hain. Kyun k tamam deeni cheezain, jaise 6 kalmay, Quran shareef kay 30 paray, ilm e hadees aur hadees ki iqsaam waghaira. Aise he hawai jahaz (airoplane) kay zeriye hajj ka safar aur jadeed hatiyar (modern weapons) say jihad waghaira. Aur dunya ki tamam cheezain jaise pulao, zerda, daak khana (post office), railway waghaira, sab bidatain hain jo Hazoor (SalAllaho Aliehe Waslam) kay baad ijaad hui hain, haram honi chahiye, halankay inhain koi haram nahi kehta.


Hadees 67:

Riwayat hai Hazrat Ibn Abbas say, fermatay hain fermaya (SalAllaho Aliehe Waslam) nay:

Allah ki bargah main teen shakhs napasnd tareen hain.

  1. Harm (خانہ کعبہ) main baydeeni kernay wala. [1]
  2. Islam main jahliyat kay tareeqay talash kernay wala. [2]
  3. Musalman kay khoon e nahaq ka mutalashi ta k us ki khonraizi keray. [3]

(Bukhari)

Sharah:

  1. الحاد kay mani hain mailaan (میلان) aur jhukna hai, shariyat main batil ki taraf jhuknay walay ko Mulhid (ملحد) kehtay hain. Bad’aqeedah aur gunnahgar donon mulhid hain, yani hadood e Makkah Mukarramah main gunnah kernay wala ya gunnah phailanay wala ya bad’aqeedgi ikhtiyar kerne wala ya rayej kernay wala k agarcha ye herkatain her jagha he buri hain magar Harm shareef main bohut zyada buri hain k us muqaam ki azmat kay bhi khilaf hain. Jaise Harm main aik naiki ka sawab aik lakh aise he aik gunnah ka azab bhi aik lakh hai, isi liye Hazrat Ibn e Abbas nay Makkah chor ker taif main qayam kiya.
  2. Yani musalman ho ker mushrikana rasoom ko pasand keray aur phailaye jaisay noha, seena kobi, fa’al nikalna waghaira, is say rawafiz ko ibrat pakarni chahiye k unhon ne jahliyat ki rasmon ko ibadat samjh rekha hai.
  3. Yani Musalman ko zulman qatal kerna to bara gunnah hai qatal ki koshish bhi bad’tareen jurm hai, is main woh sab log dakhil hain jo beqasoor ko qatal kerwayain aur qatal k baad qatil ko nahaq churwanay ki koshish kerain.

Popularity: 38% [?]

Post to Twitter Tweet This Post

Mardon Kay Sawab Main Say Aurton Ka Hissa

Hadees:

Hazrat Asma bint e Yazeed (RA) nay aik martaba Rasul e Akram (SalAllaho Aliehe Waslam) ki khidmat e aqdas main hazir ho ker arz ki, Ya Rasul Allah (SalAllaho Aliehe Waslam)! main bohut si aurton ki qasid (representative) ki haisiyat say hazir huyi hon. Humari arz yeh hai kay

“Allah nay Aap (SalAllaho Aliehe Waslam) ko mardon aur aurton donon ki taraf rasul bana ker bhaija hai, is liye hum aurtain bhi Aap (SalAllaho Aliehe Waslam) per imaan layi hain aur hum nay Aap (SalAllaho Aliehe Waslam) ki pairwi ka ayhd (wada, promise) kiya hai.

Humara masla yeh hai kay aurtain perda-nasheen bana kar gharon main bitha di gayi hain, hum apne shoharon (husbands) ki khawahishat puri kerti hain, in k bachon ko goad main liye phirti hain, in k gheron ki rakhwali aur in ka maalon aur saman ki hifazat kerti hain. Jab k mard hazraat janazon aur jihad main shirkat ker k ajr e azeem hasil ker laite hain. Aap (SalAllaho Aliehe Waslam) humain betayiye k in mardon k ajr o sawab main se hum aurton ko bhi hissa milay ga ya nahin?”

Yeh sun ker sarkar e do alam (SalAllaho Aliehe Waslam) ne sahaba karam (RA) se fermaya,

“Daikho is aurat ne apne deen k baray main kitna acha sawal kiya hai.”

Phir fermaya,

“Ay Asma! suno aur ja kar baqiya aurton ko khabar do k ager woh apne shoharon ko in ki khidmat guzari kay zeriye khush rekhain, hamaisha in ki khushnudi talab kerain aur in ki fermanbardari kerti rehain, to inhain (aurton ko) mardon k barabar he sawab milay ga.”

Yeh sun kar Hazrat Asma bint e Yazeed (RA) khushi o musarrat main sershar, takbeer legati hui wapis tashreef lay gyien.

Hasil Kalam:

Ager musalman behnain kisi sherayi maslay ka hal deriyaft kerna chahain, to inhain shar’an ijazat hai k baperda tereeqay se kisi alim e deen ya sahib e ilm musalman behn se maloomat hasil kerne ki koshish kerain. Allah irshad fermata hai,

To aye logon, ilm walon se pucho, agar tumhain ilm na ho.
تو اے لوگو علم والوں سے پوچھو اگر تمہیں علم نہ ہو

(Surah Anbiya, ayat 7)

Humari aslaf e karaam is hukam per sakhti kay sath aamil nazar ati thien. Inhain jab bhi koi masla darpaish hota, is ka hal deriyaft kerne main na sharam mahsus kertien aur na he takheer ki kotahi ka shikar hotien. Yeh waqiya isi jazba hasul e ilm ki khabar day reha hai.

Yeh b maloom hua k in per hama-waqt (her waqt) fikr e akhirat ghalib reha kerti thi, aise amaal ki justuju rekhna jo akhirat main bulandi e darjaat ka sabab banain, in ki aadat main shamil tha.

Rahmat e aalam (SalAllaho Aliehe Waslam) ki rahmat o hikmat kay qurban jayiye kay aap ne aurton ko mardon kay tamam naik amaal main main barabar ka shareek qarar diya, laikin is kay liye sherayet (conditions) yeh muqarrar fermayien kay woh aurtain apni tamam ter gherailu zimmadariyan khush aslubi o khush dili se ada kerti rehain.

Humari aaj kay doar ki musalman behnon ko bhi chahiye kay is waqiya say sabaq hasil kertay huye apne gher k kaam kaaj aur diger zimmedariyan dil laga kar puri kerain aur apne shohar ko khush rekhne ki koshish kerain, INSHALLAH is ki barkat se na sirf unhain mard hazrat kay aamaal kay sawab main se hissa hasil ho ga, balkay ghar ka mahol bhi behter say behter hota chala jaye ga. kyun kay gharon main aksar jhakray kaam chori ki bina per he zahur pazir hotay hain.

Is moqa per woh musalman behnain sanjidgi kay sath apne baray main ghoar fermayain kay jo apne zimma legaye gaye kaam, ghar ki dusri musalman behnon kay hawalay kar kay apni jaan churanay ki mazmum adat apnaye huye hain, balke is per fakhar kerti bhi nazar aati hain. Aisi behnain, kaam se raah e farar ikhtiyar kerne ki bina per sawab say to mahroom rehti he hain, lakin in ki is ghair munasib adat ki bina per ghar ka pur-aman mahol rozana maidan e jang ki surat e haal paish kerta hua nazar ata hai. Allah samajh ata fermaye.

Is waq’e main yeh pehlu bhi bay’had ghoar talab hai kay humare Rasool (SalAllaho Aliehe Waslam) nay hasul e sawab kay liye yeh nahin fermaya kay

tumhain mardon kay shana b’shana bahar nikal ker mardana kaam kernay hon gay, jis kay ba’is Allah ki Rehmat josh main aye gi aur tum per in’aamaat ki barish honay lagay gi.

Aur na hi Rasul Allah (SalAllaho Aliehe Waslam) ka jawab sun ker bibi Asma (RA) nay in alfaz kay sath zuban e aitraz daraaz ki kay Ya Rasul Allah (SalAllaho Aliehe Waslam)! hum to gharon ki qaid se azad honay ka zehn bana ker ayain thien aur Aap (SalAllaho Aliehe Waslam) humain dobara isi ki targheeb day rehe hain, Aap (SalAllaho Aliehe Waslam) humain ijazat kyun nai daite kay hum bahar ja kar mardon kay sath rehte huye har qisam ka kaam sar-anjam day kar in ki misal darjaat hasil kerain.

Is se woh musalman behnain khasusan daras e nasihat hasil fermayain jo gheron main rehte huye darjaat ki bulandi ki koshish ikhtiyar kerne ko ‘mardon ki janib se zulm’ say tabeer kerti hain aur jab unhain samjhaya jaye, to seekh-pa (bohut naraz) ho kar baghawat per uter ati hain. Unhain is bay’ja zid ko chor kar yeh zarur soachna ho ga kay b’zahir kitni he azadi hasil kar lijiye, akhir aik din to Allah ki bargah main muqayyad ho kar hazir hona hi paray ga.

Is waq’ay say yeh bhi maloom hua kay khushi kay hasul par nara e takbeer buland kerna humari aslaaf e karaam ka tereeqa reha hai. Laikin musalman behnon ko is baat ka khayal rakhna ho ga k nara buland kerte huye awaz kisi ghair mard tek na pohunche, kyun kay aurat ko awaz past (low) rakhne ka hukam diya gaya hai. Han, nadanista tor par awaz buland ho jana qabil e qarift nahin.

Allah har musalman behn ko apni gharailu zimmadari puri kerne kay zeriye mardon k sawab main hissa dar ban’nay ki tofeeq ataa fermaye. Aameen

Popularity: 29% [?]

Post to Twitter Tweet This Post

Quran o Sunnat per Aetisaam

Aetisaam (اعتیصام) jis k mani hain mana kerna ya rokna. Pakdamni ko isi liye asmat (عصمت) kehte hain k wo gunnah say rok daiti hai, is kay lughwi mani hain mazboot pakarna, chootnay aur bhagnay say rok laina. Istelah e shariyat main Quran o Sunnat ki haqqaniyat per aiteqaad aur us per hamaisha amal kernay ko aetisaam kehtay hain.

Sunnat say muraad Hazoor (SalAllaho Aliehe Waslam) kay saray fermaan aur woh amaal aur ahwaal hain jo musalmaanon kay liye qabil e amal hain, Hazoor (SalAllaho Aliehe Waslam) kay ye afaal (افعال) shariyat (شریعت) kehlatay hain, aur ahwaal shareef tareeqat (طریقت).

Sufiya karaam kay nazdeek Hazoor (SalAllaho Aliehe Waslam) kay jism kay halaat shariyat hain, qalb kay halaat tareeqat hain, rooh kay ahwaal haqeeqat (حقیقت) hain, aur ser kay halaat ma’arfat (معرفت) hain. Sunnat main ye sab shamil hain.

Hazoor (SalAllaho Aliehe Waslam) ki khasusiyat sunnat nahi, lehaza 9 biwiyan nikah main rekhna, oont per tawaf kerna, mimber per namaz perhna waghaira. Agercha ye Hazoor(SalAllaho Aliehe Waslam) kay afaal e kareema hain laiken humare liye nai. Her sunnat hadees hai, her hadees sunnat nahi.

Shariyat (شریعت) kay dalayel 4 hain, Quran, Sunnat, Ijma’ e ummat (اجماع امت) aur qayas e mujtahid (قیاس مجتہد). Kitab o sunnat asal asool hain, aur ijma o qayas in kay baad. Agar koi masla in donon main na mil sakay to udhar ruju kerain. Khilafat e Siddiqui o Farooqi ijma’ e ummat say he sabit hai aur in ka inkar kufr. Bajra aur chawalon main sood haram hai magar kitab o sunnat main is ka zikr nahi, qayas se is ki hurmat sabit hai.

Popularity: 17% [?]

Post to Twitter Tweet This Post

Page 1 of 512345»
Get Adobe Flash playerPlugin by wpburn.com wordpress themes